وادی تیراہ کو فوج کے احکامات پر خالی کروانے کی خبریں بےبنیاد ہیں، وزارت اطلاعات

وزارت اطلاعات و نشریات نے وادی تیراہ کو فوج کے احکامات پر خالی کروانے کی خبروں کو بے بنیاد قرار دیدیا ہے۔

وزارت اطلاعات کی جانب سے جاری اعلامیے میں کہا گیا ہے کہ حکومت نے وادی تیراہ سے متعلق گمراہ کن خبروں کا نوٹس لے لیا، وادی تیراہ کو خالی کروانے کا کوئی حکم جاری نہیں کیا گیا، بےبنیاد دعوے بدنیتی اور مخصوص مقاصد کے تحت پھیلائے جا رہے ہیں۔

اعلامیے میں کہا گیا ہے کہ ان خبروں کا مقصد عوام میں خوف و ہراس پھیلانا ہے، وفاقی حکومت یا مسلح افواج کا آبادی کی منتقلی کا کوئی فیصلہ نہیں، سیکیورٹی ادارے صرف دہشت گرد عناصر کے خلاف کارروائیاں کرتے ہیں۔

وزارت اطلاعات نے کہا کہ انٹیلی جنس بیسڈ آپریشنز میں پُرامن شہریوں کے تحفظ کو یقینی بنایا جاتا ہے، کسی قسم کی جبری نقل مکانی یا ہجرت نہیں کی جا رہی، مقامی آبادی خوارج کی موجودگی پر تشویش اور امن کی خواہاں ہے۔

اعلامیے میں کہا گیا ہے کہ کے پی حکومت نے ممکنہ، عارضی اور رضاکارانہ نقل و حرکت کے لیے پیشگی انتظامات کیے، تیراہ (باغ) کے بعض علاقوں کے لیے تقریباً 4 ارب روپے مختص کیے گئے، امدادی اقدامات میں ٹرانسپورٹ، خوراک، نقد امداد اور عارضی مراکز شامل ہیں۔