سانحہ گل پلازہ؛ آگ لگنے کے بعد بند دروازے کیوں نہیں کھولے گئے؟

کراچی: گل پلازہ میں آگ لگنے کے واقعے کے بعد عمارت کے بند دروازے نہ کھولے جانے کے معاملے کی تحقیقات جاری ہیں۔ پولیس نے چوکیدار اور چھے سیکیورٹی گارڈ کے بیانات حاصل کر لیے ہیں۔

تفصیلات کے مطابق ایس ایس پی سٹی عارف عزیز نے بتایا کہ مقدمہ درج ہونے کے بعد تمام ضروری بیانات حاصل کیے جا رہے ہیں تاکہ واقعے کے ہر پہلو کا جائزہ لیا جا سکے۔

عارف عزیز نے کہا کہ آگ لگنے کے وقت عمارت میں چوکیدار اور چھے سیکیورٹی گارڈ موجود تھے۔ تحقیقات میں ایک ڈی وی آر بھی شامل کیا گیا ہے، جس سے آگ لگنے کے وقت کے حالات کی جانچ کی جا رہی ہے۔

انہوں نے واضح کیا کہ اگر تحقیقات میں غفلت یا لاپروائی سامنے آتی ہے تو تمام حقائق عوام کے سامنے لائے جائیں گے۔

ایس ایس پی نے مزید بتایا کہ تحقیقات مکمل ہونے کے بعد ذمہ دار افراد کے خلاف قانون کے مطابق کارروائی عمل میں لائی جائے گی۔