بھاٹی گیٹ واقعہ؛ متوفی خاتون کے شوہر پر تشدد، شہری کا میڈیکل کرانے کا فیصلہ

لاہور: بھاٹی گیٹ پر گزشتہ دنوں مین ہول میں گر کر جان بحق ہونے والی خاتون سعدیہ کے شوہر غلام مرتضیٰ پر پولیس کے تشدد کے الزامات سامنے آئے ہیں۔

وزیراعلیٰ پنجاب مریم نواز نے اس واقعے پر شدید برہمی کا اظہار کیا ہے اور کہا کہ شہری کے ساتھ ہونے والے ممکنہ ظلم کی تحقیقات کی جائیں۔

پولیس ذرائع کے مطابق غلام مرتضیٰ کا میڈیکل کروانے کا فیصلہ کیا گیا ہے تاکہ تشدد کی نوعیت واضح ہو سکے۔ میڈیکل پولیس کی نگرانی میں شور کوٹ کے مقامی اسپتال میں ہوگا۔

ذرائع نے بتایا کہ میڈیکل رپورٹ کی بنیاد پر تشدد کرنے والے افسران کے خلاف قانونی کارروائی کی جا سکتی ہے۔ غلام مرتضیٰ نے ایس پی سٹی اور ایس ایچ او پر الزام عائد کیا کہ انہیں بیوی کے قتل کا اعتراف کرنے کے لیے دباؤ ڈالا گیا۔

پولیس کے مطابق مقدمے کی مزید تفصیلات میڈیکل رپورٹ آنے کے بعد طے کی جائیں گی۔ اس واقعے کی تحقیقات جاری ہیں تاکہ شہریوں کے حقوق اور انصاف کو یقینی بنایا جا سکے۔