سانحہ گل پلازہ: سندھ ہائیکورٹ کے جسٹس آغا فیصل سانحے کی جوڈيشل انکوائری کرینگے

کراچی: سندھ ہائیکورٹ کے جسٹس آغا فیصل سانحہ گل پلازہ کی تحقیقات کے لیے جوڈیشل کمیشن قائم کریں گے۔

کمیشن کا مقصد گل پلازہ میں لگنے والی آگ کی اصل وجوہات معلوم کرنا اور شاپنگ سینٹر کی تعمیرات میں بلڈنگ پلان کی خلاف ورزی کا جائزہ لینا ہوگا۔

جوڈیشل کمیشن آگ لگنے سے پہلے اور بعد کے ذمہ داروں کا تعین کرے گا اور اپنی تحقیقات آٹھ ہفتوں کے اندر مکمل کرے گا۔

واضح رہے کہ 17 جنوری 2026 کو کراچی کے ایم اے جناح روڈ پر واقع معروف شاپنگ سینٹر گل پلازہ میں آگ لگی تھی، جو تین روز تک بھڑکتی رہی۔ اس سانحے میں 70 سے زائد افراد جاں بحق اور متعدد زخمی ہوئے۔

گل پلازہ کی تباہی اور کمشنر کراچی کی ابتدائی رپورٹ پر سیاسی جماعتوں اور سول سوسائٹی نے عدم اعتماد کا اظہار کیا تھا۔ اس کے بعد سندھ حکومت سے جوڈیشل کمیشن بنانے کی درخواست کی گئی تھی تاکہ شفاف تحقیقات کی جا سکیں۔

یہ اقدام اس سانحے کی مکمل تحقیقات اور مستقبل میں ایسے حادثات کی روک تھام کے لیے اہم قدم قرار دیا جا رہا ہے۔