مقبوضہ کشمیر میں ماورائے عدالت قتل، انسانی حقوق کی خلاف ورزیوں پر عالمی توجہ کی ضرورت ہے، عاصم افتخار

اقوامِ متحدہ میں پاکستان کے مستقل مندوب عاصم افتخار نے کہا ہے کہ بھارت کے غیر قانونی زیرِ قبضہ جموں و کشمیر میں ماورائے عدالت قتل، جبری گمشدگیاں اور انسانی حقوق کی سنگین خلاف ورزیاں ایک تلخ حقیقت بن چکی ہیں، جن پر عالمی برادری کی فوری اور مؤثر توجہ ناگزیر ہے۔

یومِ یکجہتی کشمیر کے موقع پر منعقدہ تقریب سے خطاب کرتے ہوئے عاصم افتخار نے واضح کیا کہ پاکستان کشمیری عوام کے حقِ خودارادیت کی غیر متزلزل حمایت جاری رکھے گا۔ انہوں نے کہا کہ مقبوضہ کشمیر میں لاکھوں افراد ظلم، جبر اور خوف کے سائے تلے زندگی گزارنے پر مجبور ہیں، جبکہ ان کی بنیادی آزادیوں کو مسلسل پامال کیا جا رہا ہے۔

پاکستانی مندوب نے 5 اگست 2019 کے بھارتی غیر قانونی اور یکطرفہ اقدامات کو بین الاقوامی قوانین اور اقوامِ متحدہ کی قراردادوں کی کھلی خلاف ورزی قرار دیتے ہوئے کہا کہ ان اقدامات کے بعد مقبوضہ کشمیر کو ایک کھلی جیل میں تبدیل کر دیا گیا۔ مسلسل لاک ڈاؤن اور کرفیو کے باعث تعلیمی ادارے بند ہیں، معیشت تباہ ہو چکی ہے اور سیاحت و زراعت جیسے اہم شعبے بری طرح متاثر ہوئے ہیں۔

عاصم افتخار نے زور دیا کہ بھارتی فورسز کی جانب سے ماورائے عدالت قتل اور دیگر انسانی حقوق کی خلاف ورزیاں معمول بن چکی ہیں، جو عالمی ضمیر کے لیے ایک بڑا چیلنج ہیں۔ انہوں نے کہا کہ کشمیری عوام کا حقِ خودارادیت اقوامِ متحدہ کی تسلیم شدہ قراردادوں کے تحت ایک مسلمہ حق ہے، جسے طاقت کے زور پر دبایا نہیں جا سکتا۔

انہوں نے عالمی برادری سے مطالبہ کیا کہ وہ بھارت کو مقبوضہ کشمیر میں انسانی حقوق کی خلاف ورزیاں بند کرنے پر مجبور کرے اور کشمیری عوام کو ان کا جائز حق دلانے میں اپنا کردار ادا کرے۔ عاصم افتخار نے واضح کیا کہ پاکستان ہر عالمی فورم پر کشمیریوں کی آواز بن کر بھارتی مظالم کو بے نقاب کرتا رہے گا اور اس جدوجہد میں کشمیری عوام کو کبھی تنہا نہیں چھوڑے گا۔