باجوڑ؛ چیک پوسٹ پر دہشتگردوں کا حملہ ناکام، 12 خوارج ہلاک، 11 اہلکار شہید

آئی ایس پی آر کا کہنا ہے کہ سیکیورٹی فورسز نے باجوڑ میں مشترکہ چیک پوسٹ پر دہشت گرد حملے کی کوشش ناکام بنادی۔

پاک فوج کے شعبہ تعلقات عامہ ( آئی ایس پی آر ) کے مطابق سیکیورٹی فورسز نے باجوڑ میں مشترکہ چیک پوسٹ پر دہشت گرد حملے کی کوشش ناکام بناتے ہوئے 12 خوارج کو جہنم واصل کردیا۔

  آئی ایس پی آر کا کہنا ہے کہ حملہ آور نے بارود سے بھری گاڑی چیک پوسٹ کی بیرونی دیوار سے ٹکرادی، دھماکے میں 11 بہادر جوانوں نے جام شہادت نوش کیا۔

آئی ایس پی آر کے مطابق قریبی رہائشی عمارتیں بھی دھماکے سے شدید متاثر ہوئیں، دھماکے سے معصوم بچی شہید، خواتین اور بچوں سمیت 7 افراد زخمی ہوئے۔