پاکستان میں پہلے روزے کے حوالے سے اہم خبر سامنے آگئی

محکمہ موسمیات نے پیشگوئی کی ہے کہ رمضان المبارک 1447 ہجری کا آغاز 19 فروری 2026 سے ہونے کا امکان ہے۔

 محکمہ موسمیات کے مطابق رمضان کا چاند 18 فروری کی شام نظر آنے کا امکان ہے، یعنی 29 شعبان 1447 ہجری بروز بدھ چاند دیکھنے کے امکانات ہیں۔

فلکیاتی معلومات کے مطابق چاند کی پیدائش 17 فروری کو شام 5 بجکر 1 منٹ پر ہوگی۔ 18 فروری کی شام غروبِ آفتاب کے وقت چاند کی عمر 25 گھنٹے 48 منٹ سے زائد ہوگی۔

ساحلی علاقوں میں غروبِ آفتاب اور غروبِ ماہتاب کے درمیان تقریباً 59 منٹ کا فرق ہوگا، جس سے چاند کو آسانی سے دیکھا جا سکے گا۔

محکمہ موسمیات کا کہنا ہے کہ زیادہ تر علاقوں میں موسم صاف رہنے کی توقع ہے، جو رویتِ ہلال کے لیے سازگار حالات فراہم کرے گا۔