سندھ یوتھ کارڈ کن نوجوانوں کو ملے گا اور اس سے کیا فائدہ حاصل ہوسکے گا؟ تفصیلات جانیے

حکومت سندھ نے صوبے کے نوجوانوں کے لیے ایک اہم فلاحی منصوبہ متعارف کروانے کی تیاری شروع کر دی ہے۔

 اس منصوبے کو سندھ یوتھ کارڈ پروگرام کا نام دیا گیا ہے۔ اس پروگرام کا مقصد نوجوانوں کو تعلیم، تربیت اور روزگار کے بہتر مواقع فراہم کرنا ہے۔ ذرائع کے مطابق چیئرمین پاکستان پیپلز پارٹی بلاول بھٹو زرداری کی ہدایت پر اس منصوبے کا باقاعدہ مسودہ تیار کر لیا گیا ہے اور اسے جلد منظوری کے لیے پیش کیا جائے گا۔

اس سلسلے میں سندھ کے وزیر کھیل و امور نوجوانان سردار محمد بخش مہر کی صدارت میں ایک اہم اجلاس منعقد ہوا۔ اجلاس میں محکمہ کھیل اور یوتھ افیئرز کے اعلیٰ حکام نے شرکت کی۔ سیکریٹری کھیل منور علی مہیسر نے اجلاس کے دوران یوتھ کارڈ پروگرام کے طریقہ کار کے بارے میں تفصیلی بریفنگ دی۔ حکام کو بتایا گیا کہ منصوبے کے پہلے مرحلے میں سندھ کے تمام 30 اضلاع سے ایک لاکھ نوجوانوں کو یوتھ کارڈ جاری کیا جائے گا۔ اس پروگرام کے ذریعے نوجوانوں کو مختلف سرکاری سہولتوں تک آسان رسائی فراہم کی جائے گی۔

صوبائی وزیر کے مطابق یہ کارڈ صرف ان نوجوانوں کو دیا جائے گا جن کے پاس سندھ کا ڈومیسائل ہوگا۔ اس کے لیے عمر کی حد 15 سے 29 سال مقرر کی گئی ہے۔ حکومت کا منصوبہ ہے کہ یوتھ کارڈ رکھنے والے نوجوانوں کو صوبے کے مختلف اضلاع میں قائم یوتھ ڈویلپمنٹ سینٹرز میں تربیت فراہم کی جائے۔ ان مراکز میں نوجوانوں کو جدید مہارتیں سکھائی جائیں گی تاکہ وہ عملی زندگی میں کامیاب ہو سکیں۔

یوتھ کارڈ پروگرام میں لڑکوں اور لڑکیوں کے ساتھ ساتھ اقلیتی برادری اور خصوصی افراد کو بھی شامل کیا جائے گا۔ کارڈ رکھنے والے نوجوانوں کو تعلیم کے لیے اسکالرشپس، کاروبار شروع کرنے کے لیے بلاسود قرضے اور مختلف اداروں میں انٹرن شپ کے مواقع فراہم کیے جائیں گے۔ اس کے علاوہ بیرون ملک ملازمت کے خواہش مند نوجوانوں کے لیے خصوصی تربیتی پروگرام بھی ترتیب دیے جائیں گے تاکہ وہ عالمی مارکیٹ میں بہتر مواقع حاصل کر سکیں۔

حکومت نوجوان خواتین کی سہولت کے لیے بھی خصوصی اقدامات پر غور کر رہی ہے۔ اس حوالے سے یوتھ کارڈ رکھنے والی طالبات اور خواتین کے لیے پنک اسکوٹی یا متبادل ٹرانسپورٹ سہولت فراہم کرنے کی تجویز زیر غور ہے۔ اس اقدام کا مقصد خواتین کو تعلیم اور روزگار کے لیے آسان اور محفوظ سفر کی سہولت دینا ہے۔

کھیل کے شعبے سے وابستہ نوجوانوں کے لیے بھی یہ منصوبہ فائدہ مند ثابت ہوگا۔ حکام کے مطابق یوتھ کارڈ کے ذریعے باصلاحیت کھلاڑیوں کو بین الاقوامی معیار کی کوچنگ اور تربیت فراہم کی جائے گی۔ اس کے ساتھ انہیں صحت اور فٹنس کی بہتر سہولیات بھی دی جائیں گی تاکہ وہ قومی اور بین الاقوامی سطح پر پاکستان کا نام روشن کر سکیں۔

ذرائع کے مطابق یوتھ کارڈ پروگرام کے مسودے کو اب قانونی جانچ پڑتال کے لیے محکمہ قانون کو بھیجا جائے گا۔ قانونی مراحل مکمل ہونے کے بعد اس منصوبے کو باقاعدہ منظوری کے لیے سندھ کابینہ میں پیش کیا جائے گا۔ منظوری کے بعد اس پروگرام کو مرحلہ وار نافذ کیا جائے گا تاکہ زیادہ سے زیادہ نوجوان اس سے فائدہ اٹھا سکیں۔