ایران جنگ کے باعث پاکستان میں ادویات کی قلت کا خدشہ

ایران جنگ کے باعث پاکستان میں ادویات کی فراہمی متاثر ہونے کا خطرہ بڑھ گیا ہے، جس پر ڈرگ ریگولیٹری اتھارٹی نے فارما کمپنیوں کے لیے ہنگامی ایڈوائزری جاری کر دی۔

ڈرگ ریگولیٹری اتھارٹی آف پاکستان نے فارماسیوٹیکل کمپنیوں کے لیے جاری ہنگامی ایڈوائزری میں خبردار کیا ہے کہ عالمی کشیدگی کے باعث ادویات کے خام مال اور پیکنگ مواد کی عالمی سپلائی متاثر ہو سکتی ہے، جس سے مقامی سطح پر ادویات کی پیداوار متاثر ہونے کا خطرہ موجود ہے۔

ڈریپ نے دوا ساز کمپنیوں کو ہدایت کی ہے کہ وہ کسی ایک سپلائر پر انحصار کرنے کے بجائے متعدد ذرائع سے خام مال حاصل کریں اور اضافی ذخیرہ بھی رکھیں تاکہ ممکنہ بحران سے بچا جا سکے۔

یہ بھی پڑھیں : ایران کا بھارتی پالیسی پر سخت ردعمل، آبنائے ہرمز میں بھارتی سامان لے جانے والے جہاز پر حملہ

اتھارٹی کے مطابق عالمی حالات کے باعث شپنگ میں تاخیر یا دیگر غیر متوقع مسائل پیدا ہو سکتے ہیں، جس کے نتیجے میں ادویات کی فراہمی متاثر ہو سکتی ہے۔

حکام کا کہنا ہے کہ سپلائی چین کی سخت نگرانی کی جائے گی جبکہ بلیک مارکیٹنگ اور ذخیرہ اندوزی کی روک تھام کے لیے بھی اقدامات کیے جائیں گے۔

اس کے علاوہ سرکاری اداروں کو ہدایت دی گئی ہے کہ وہ عوام کو ادویات کی بلا تعطل فراہمی کو ترجیحی بنیادوں پر یقینی بنائیں۔