بیرون ملک سے پاکستان آنے والے مسافروں کیلئے بڑی خبر آگئی

اسلام آباد انٹرنیشنل ایئرپورٹ پر بیرونِ ملک سے آنے والے مسافروں کے لیے ایک نئی سہولت متعارف کروا دی گئی ہے۔

 پاکستان ایئرپورٹس اتھارٹی نے مسافروں کی آسانی کے لیے ایئرپورٹ کے اندر فارن کرنسی ایکسچینج کاؤنٹر قائم کر دیا ہے۔ اس سہولت کے ذریعے مسافر اب ایئرپورٹ پر ہی اپنی غیر ملکی کرنسی کو پاکستانی روپے میں تبدیل کر سکیں گے۔

اس نئے کاؤنٹر کا افتتاح پاکستان ایئرپورٹس اتھارٹی کی ڈائریکٹر کمرشل و اسٹیٹ رابعہ سلمیٰ نے کیا۔ اس موقع پر ایئرپورٹ منیجر اور کمرشل ڈیپارٹمنٹ کے دیگر افسران بھی موجود تھے۔

 حکام کے مطابق یہ کاؤنٹر اسلام آباد ایئرپورٹ کے انٹرنیشنل آرائیول لاؤنج میں قائم کیا گیا ہے تاکہ بیرونِ ملک سے آنے والے مسافروں کو فوری سہولت فراہم کی جا سکے۔

ماضی میں مسافروں کو غیر ملکی کرنسی تبدیل کروانے کے لیے ایئرپورٹ سے باہر شہر کے مختلف ایکسچینج سینٹرز کا رخ کرنا پڑتا تھا۔ اس عمل میں وقت بھی ضائع ہوتا تھا اور بعض اوقات مسافروں کو مشکلات کا سامنا بھی کرنا پڑتا تھا۔

 اب اس نئی سہولت کے بعد مسافر ایئرپورٹ سے باہر نکلنے سے پہلے ہی اپنی کرنسی تبدیل کر سکیں گے اور انہیں فوری طور پر مقامی کرنسی دستیاب ہوگی۔