پی ٹی آئی کا پارلیمانی سیاست میں واپسی کا فیصلہ، قائمہ کمیٹیوں میں شمولیت پر اتفاق

پاکستان تحریک انصاف کی اعلیٰ قیادت نے ملک کے بدلتے ہوئے سیاسی تناظر میں پارلیمانی سیاست کے اندر اپنا کردار دوبارہ فعال کرنے کی بھرپور تیاری کر لی ہے۔

ذرائع کے مطابق پی ٹی آئی کی مرکزی قیادت کے درمیان ہونے والی اہم مشاورت کے بعد اس بات پر مکمل اتفاقِ رائے پایا گیا ہے کہ پارٹی کو پارلیمان کی قائمہ کمیٹیوں میں فوری طور پر واپس جانا چاہیے۔

اس سے قبل قائمہ کمیٹیوں میں شرکت کے حوالے سے پارٹی کے اندر جو فکری اختلافات پائے جاتے تھے، وہ اب مکمل طور پر ختم ہو چکے ہیں اور قیادت کے تمام دھڑوں میں اس معاملے پر مکمل ہم آہنگی پیدا ہو گئی ہے۔

ذرائع کا کہنا ہے کہ پی ٹی آئی قیادت نے اس فیصلے کے نتیجے میں علیمہ خان اور پارٹی کے سوشل میڈیا ونگ کی جانب سے ہونے والی ممکنہ تنقید سے بچنے کے لیے ایک جامع حکمت عملی بھی مرتب کی ہے۔

یہ بھی پڑھیں : بانی پی ٹی آئی اور بشریٰ بی بی کی سزا معطلی کی درخواستیں سماعت کیلئے مقرر

اس سلسلے میں فیصلہ کیا گیا ہے کہ علیمہ خان کو اعتماد میں لیا جائے گا تاکہ پارٹی کے اندرونی اور بیرونی بیانیے میں کوئی تضاد پیدا نہ ہو۔

قیادت کا ماننا ہے کہ پارلیمانی کمیٹیوں سے باہر رہ کر سیاسی نقصان ہو رہا ہے، اس لیے اب ایوان کے اندر رہ کر بھرپور اپوزیشن کا کردار ادا کرنا وقت کی اہم ضرورت ہے۔

اس اہم سیاسی پیش رفت کا باضابطہ اعلان آئندہ چند دنوں میں متوقع ہے، جس کے لیے محمود خان اچکزئی اور علامہ راجہ ناصر عباس کی قیادت میں ایک سیاسی فریم ورک تیار کیا جا رہا ہے۔

ذرائع کے مطابق پی ٹی آئی اس فیصلے کے ذریعے یہ پیغام دینا چاہتی ہے کہ وہ تمام تر قانونی اور سیاسی چیلنجز کے باوجود پارلیمانی عمل کا حصہ رہ کر عوامی مسائل پر آواز اٹھاتی رہے گی۔