سرکاری ملازمین کی تنخواہوں سے متعلق پریشان کن خبر آگئی

کابینہ ڈویژن نے سرکاری ملازمین کی تنخواہوں میں کٹوتی کے حوالے سے جاری نوٹیفکیشن پر وضاحت دیتے ہوئے اہم تفصیلات سامنے رکھ دی ہیں۔

اعلامیے کے مطابق یہ فیصلہ قانونی و خودمختار اداروں، ریگولیٹری اتھارٹیز اور سرکاری ملکیتی اداروں کے ان ملازمین کے لیے ہے جن کی ماہانہ تنخواہ تین لاکھ روپے یا اس سے زیادہ ہے۔ اس اقدام کا مقصد مالی نظم و ضبط کو بہتر بنانا بتایا گیا ہے۔

اعلامیے میں کہا گیا ہے کہ یہ کٹوتی دو ماہ کے لیے ہوگی اور مقررہ شرح کے مطابق تنخواہ سے رقم کم کی جائے گی۔ اس فیصلے کا اطلاق اداروں کے اعلیٰ عہدیداران پر بھی ہوگا، جن میں سربراہان، چیف ایگزیکٹو افسران، ایگزیکٹو ڈائریکٹرز، ڈائریکٹرز اور سینئر مینیجرز شامل ہیں۔

کابینہ ڈویژن نے وضاحت کی کہ یہ اعلامیہ 14 مارچ 2026 کے نوٹیفکیشن کے بعد پیدا ہونے والے ابہام کو دور کرنے کے لیے جاری کیا گیا ہے۔ مختلف اداروں کی جانب سے اس حوالے سے سوالات اٹھائے گئے تھے، جن کے جواب میں یہ تفصیلی بیان سامنے لایا گیا۔

اعلامیے کے مطابق یہ فیصلہ کابینہ سیکرٹری کی منظوری سے جاری کیا گیا ہے اور اس پر فوری عملدرآمد کیا جائے گا۔