کال سینٹرز میں کام کرنے والوں کیلئے حکومت کا بڑا اعلان

وفاقی حکومت نے توانائی بحران کے دوران کال سینٹرز کے لیے اہم ریلیف کا اعلان کر دیا ہے۔ اب ملک بھر میں کام کرنے والے کال سینٹرز اور بزنس پراسیس آؤٹ سورسنگ کمپنیوں کو اوقات کار کی پابندی سے مکمل استثنیٰ حاصل ہوگا۔

وفاقی وزیر برائے آئی ٹی و ٹیلی کام شیزہ خواجہ کے مطابق یہ فیصلہ اس لیے کیا گیا ہے تاکہ آئی ٹی سیکٹر کی سرگرمیاں متاثر نہ ہوں۔ دیگر کاروباری مراکز پر اگرچہ جلد بندش کے احکامات نافذ ہیں، لیکن کال سینٹرز ان پابندیوں سے آزاد ہوں گے اور 24 گھنٹے کام جاری رکھ سکیں گے۔

حکام کا کہنا ہے کہ پاکستان کا آئی ٹی اور بی پی او سیکٹر ملکی معیشت میں اہم کردار ادا کر رہا ہے۔ اسی وجہ سے اس شعبے کو سہولت دینا ضروری ہے تاکہ برآمدات اور آن لائن سروسز میں خلل نہ آئے۔

مزید یہ کہ اسلام آباد اور راولپنڈی میں حالیہ مقامی تعطیلات کا اطلاق بھی کال سینٹرز پر نہیں ہوگا۔ اس فیصلے کا مقصد غیر ملکی کلائنٹس کے ساتھ کام کرنے والی کمپنیوں کے آپریشنز کو جاری رکھنا ہے۔

وفاقی وزیر نے یہ بھی تسلیم کیا کہ بعض علاقوں میں ضلعی انتظامیہ کی جانب سے معلومات کی فراہمی میں تاخیر ہوئی ہے، جس کی وجہ سے کچھ مشکلات سامنے آئیں۔ تاہم حکومت نے یقین دہانی کروائی ہے کہ ان مسائل کو جلد حل کیا جائے گا۔

کال سینٹرز کو ہدایت دی گئی ہے کہ اگر انہیں سیکیورٹی یا اوقات کار سے متعلق کسی قسم کی دشواری پیش آئے تو وہ پاکستان سافٹ ویئر ایکسپورٹ بورڈ (پی ایس ای بی) سے رابطہ کریں۔ پی ایس ای بی کے پورٹل کے ذریعے شکایات کا ازالہ 24 گھنٹوں کے اندر کیا جائے گا۔