پاکستان کی ایران اور امریکہ سے سیز فائر برقرار رکھنے کی اپیل

اسحاق ڈار نے امریکہ اور ایران کے درمیان جاری مذاکراتی عمل پر اہم بیان جاری کرتے ہوئے فریقین پر زور دیا ہے کہ وہ جنگ بندی کے معاہدے کی پاسداری کو ہر صورت یقینی بنائیں۔

پاکستان کے نائب وزیر اعظم اور وزیر خارجہ اسحاق ڈار نے اسلام آباد میں ہونے والے امریکہ اور ایران مذاکرات کے حوالے سے ایک باضابطہ اعلامیہ جاری کیا ہے، جس میں انہوں نے دونوں عالمی قوتوں کے درمیان تناؤ کم کرنے کے لیے پاکستان کی مخلصانہ کوششوں کا اعادہ کیا ہے۔

اسحاق ڈار نے اپنے بیان میں اس بات پر سخت زور دیا کہ موجودہ حالات میں یہ انتہائی ناگزیر ہے کہ تمام متعلقہ فریقین جنگ بندی کے حوالے سے کیے گئے اپنے وعدوں اور عزم پر سختی سے قائم رہیں۔ ان کا کہنا تھا کہ سیز فائر کا تسلسل ہی وہ واحد راستہ ہے، جس کے ذریعے خطے کو مزید کسی بڑی تباہی سے بچایا جا سکتا ہے۔

نائب وزیر اعظم نے اپنی گفتگو میں اس امید کا اظہار کیا کہ امریکہ اور ایران دونوں ہی مثبت جذبے کے ساتھ اپنے مذاکراتی عمل کو آگے بڑھائیں گے تاکہ نہ صرف اس خطے بلکہ اس سے باہر کی دنیا کے لیے بھی پائیدار امن اور خوشحالی کے اہداف حاصل کیے جا سکیں۔

یہ بھی پڑھیں : ہمیں مذاکرات کی کوئی جلدی نہیں، گیند اب امریکہ کے کورٹ میں ہے، ایران

انہوں نے واضح کیا کہ پاکستان کی سرزمین پر ہونے والے یہ مذاکرات ایک مثبت پیش رفت ہیں اور پاکستان آنے والے دنوں میں بھی ایران اور امریکہ کے درمیان بات چیت اور سفارتی روابط کو مزید بہتر بنانے کے لیے اپنا فعال اور سہولت کار کا کردار جاری رکھنے کے لیے پرعزم ہے۔

اسحاق ڈار نے اس موقع پر امریکہ اور ایران دونوں ممالک کی قیادت کا شکریہ بھی ادا کیا، جنہوں نے جنگ بندی کے حصول کے لیے پاکستان کی انتھک کوششوں کو تسلیم کیا اور ان کی تعریف کی۔

انہوں نے دونوں جانب سے ملنے والی اس پذیرائی کو پاکستان کی خارجہ پالیسی کی کامیابی قرار دیتے ہوئے کہا کہ عالمی امن کے لیے پاکستان ہمیشہ اپنا مثبت حصہ ڈالتا رہے گا۔

نائب وزیر اعظم نے ایک بار پھر اس خواہش کو دہرایا کہ دونوں فریقین تعمیری سوچ کے ساتھ آگے بڑھیں تاکہ خطے میں جاری بے یقینی کا خاتمہ ہو اور عوام کو ترقی و سکون کے ثمرات مل سکیں۔