ایشیا کپ: پاکستان کو شکست، سری لنکا فائنل میں پہنچ گیا

ایشیا کپ 2023 کے سپر فور مرحلے کے اہم میچ میں سری لنکا نے پاکستان کو سنسنی خیز مقابلے کے بعد 2 وکٹوں سے شکست دے کر ایونٹ کے فائنل کے لئے کوالیفائی کر لیا۔

لنکن ٹائیگرز نے کولمبو میں کھیلے جانے والے بڑے میچ میں 253 کا ہدف 8 وکٹوں کے نقصان پر میچ کی آخری گیند پر مکمل کیا۔

سپر فور مرحلے کے اہم میچ میں پاکستان نے ٹاس جیت کر پہلے بیٹنگ کا فیصلہ کیا اور مقررہ 42 اوورز میں 7 وکٹوں کے نقصان پر 252 رنز بنائے۔

واضح رہے کہ میچ کو بارش کے باعث 42 اوورز تک محدود کر دیا گیا تھا۔

پاکستان کی جانب سے پہلی وکٹ 9 سکور پر فخر زمان کی گری ، وہ 11 گیندوں پر 4 رنز کی اننگ کھیل سکے جبکہ دوسری وکٹ 73 رنز پر کپتان بابر اعظم کی گری جو 35 گیندوں پر 29 رنز کی اننگ کھیل کر کیچ آؤٹ ہوئے۔

پاکستان کا تیسرا نقصان 100 رنز پر ہوا جب اوپنر عبداللہ شفیق 69 گیندوں پر 52 رنز بنا کر کیچ آؤٹ ہوئے جبکہ چوتھے آؤٹ ہونے والے کھلاڑی محمد حارث تھے جو 9 گیندوں پر محض 3 سکور کر سکے۔

قومی ٹیم کی پانچویں وکٹ 130 سکور پر گری جب محمد نواز 12 گیندوں پر 12 رنز کی اننگ کھیل کر بولڈ ہوئے۔

27.4 اوورز کے بعد میچ کو بارش کے باعث روک دیا گیا تاہم بارش کے بعد میچ دوبارہ شروع ہونے پر محمد رضوان اور افتخار احمد کی 108 رنز کی مضبوط پارٹنر شپ نے قومی بیٹنگ لائن کو سہارا دیا، 238 رنز پر افتخار احمد بھی کیچ آؤٹ ہوگئے ، انہوں نے 40 گیندوں پر 47 رنز بنائے۔

محمد رضوان نے 73 گیندوں پر ناقابل شکست 86 رنز کی شاندار اننگ کھیلی اور ٹیم کا مجموعی سکور 252 تک پہنچانے میں اہم کردار ادا کیا۔

سری لنکا کی جانب سے متھیشا پتیرانا نے 3 اور پرمود مدوشن نے 2 وکٹیں حاصل کیں۔

جواب میں سری لنکن ٹیم نے 253 رنز کا ہدف 8 وکٹوں کے نقصان پر میچ کی آخری گیند پر مکمل کر کے ایونٹ کے فائنل کے لئے کوالیفائی کر لیا جہاں اسکا مقابلہ بھارتی ٹیم سے ہوگا۔

سری لنکا کی جانب سے کوسال مینڈس 87 گیندوں پر 91 رنز کی اننگ کھیل کر نمایاں رہے جبکہ سدیرا سمارا وکرما نے 48 ، اور چارتھ اسالنکا نے 49 رنز کی ناقابل شکست اننگ کھیل ٹیم کی کامیابی میں اہم کردار ادا کیا۔

پاکستان کی جانب سے افتخار احمد نے تین، شاہین آفریدی نے 2 اور زمان خان نے ایک کھلاڑی کو آؤٹ کیا۔

ایشیا کپ 2023 کا فائنل میچ اتوار کو بھارت اور سری لنکا کے درمیان کھیلا جائے گا۔

یہ  پڑھیں : کبھی سوچا نہیں تھا کہ پاکستان کیلئے ایشیا کپ جیسا ٹورنامنٹ کھیلوں گا: زمان خان