چیمپئنز ٹرافی میں پاکستان اب بھی کوالیفائی کر سکتا ہے مگر کیسے؟

چیمپئنز ٹرافی میں پاکستان اب بھی کوالیفائی کر سکتا ہے۔

پاکستان کرکٹ ٹیم کے لیے چیمپئنز ٹرافی کے اگلے راؤنڈ تک پہنچنے کا سفر مشکل ہو چکا ہے، لیکن یہ اب بھی ناممکن نہیں۔ نیوزی لینڈ اور بھارت کے خلاف دو لگاتار شکستوں کے بعد پاکستان کی سیمی فائنل تک رسائی کی امیدیں اب صرف تکنیکی امکان پر ٹکی ہوئی ہیں۔ تاہم، اس کے لیے باقی میچز کے نتائج پر انحصار کرنا پڑے گا۔

پاکستان کو اپنا اگلا میچ 27 فروری کو بنگلہ دیش کے خلاف راولپنڈی میں بڑے مارجن سے جیتنا ہوگا۔ اس کے ساتھ ساتھ نیوزی لینڈ کو اپنے دونوں میچز میں بھاری مارجن سے ہارنا ہوگا، تب ہی پاکستان کی ٹیم ٹورنامنٹ میں آگے بڑھنے کا موقع حاصل کر سکتی ہے۔

کل راولپنڈی میں نیوزی لینڈ اور بنگلہ دیش کے درمیان ہونے والا مقابلہ پاکستانی فینز کے لیے انتہائی اہم ہوگا۔ اگر نیوزی لینڈ یہ میچ جیت جاتا ہے یا میچ بارش کی وجہ سے واش آؤٹ ہو جاتا ہے تو پاکستان کی ٹیم آفیشلی ٹورنامنٹ سے باہر ہو جائے گی۔ لیکن اگر بنگلہ دیش یہ میچ جیت جاتا ہے، تو پاکستان کی امیدیں برقرار رہیں گی۔

پاکستان اور بنگلہ دیش کا میچ 27 فروری کو راولپنڈی میں کھیلا جائے گا، جبکہ بھارت اور نیوزی لینڈ کے درمیان میچ 2 مارچ کو شیڈول ہے۔ پاکستان کی سیمی فائنل تک رسائی کی امیدیں بظاہر کم ہیں، لیکن کرکٹ کے کھیل میں کچھ بھی اس وقت تک ناممکن نہیں جب تک اس کے ہونے کا امکان مکمل طور پر رد نہیں ہو جاتا۔

پاکستان کرکٹ کے فینز کی نظریں اب کل کے نیوزی لینڈ اور بنگلہ دیش کے میچ پر ہوں گی، جو پاکستان کی قسمت کا فیصلہ کر سکتا ہے۔ واضح رہے کہ چیمپئنز ٹرافی میں پاکستان کو 19 فروری کو نیوزی لینڈ اور 22 فروری کو بھارتی ٹیم کے ہاتھوں 6 وکٹوں سے شکست کا سامنا کرنا پڑا۔