ویرات کوہلی بھارتی کرکٹ بورڈ پر برہم

معروف بیٹر ویرات کوہلی فیملیز پروٹوکولز سے متعلق بھارتی کرکٹ بورڈ پر برس پڑے۔

آسٹریلیا کے خلاف سیریز کے بعد بھارتی کرکٹ بورڈ نے فیملیز سے متعلق ہدایات جاری کی تھیں۔ جس فیصلے کے تحت 45 روزہ دورے میں کھلاڑی فیملیز کو 14 روز سے زیادہ ساتھ نہیں رکھ سکیں گے۔

تاہم اب اس حوالے سے بھارتی بیٹر ویرات کوہلی کا کہنا ہے کہ کوئی بھی کھلاڑی نہیں چاہے گا کہ وہ اکیلا بیٹھے اور رنجیدہ ہو، ٹور کے دوران خراب پرفارمنس کے بعد آپ اکیلے بیٹھ کر رنجیدہ نہیں ہوسکتے۔

انہوں نے کہا ہے کہ میں نارمل رہنا چاہتا ہوں پھر آپ اپنی گیم پر کام کرتے ہیں، آپ کسی بھی کھلاڑی سے پوچھیں گے کہ کیا فیملی آپ کے ساتھ ہو تو جواب ہاں میں ہوگا۔

ویرات کوہلی نے کہا کہ میں اپنی فیملی کے ساتھ وقت گزارنے کا کوئی موقع مس نہیں کرنا چاہوں گا، ٹینشن کی صورتحال کے بعد فیملی سے آکر ملنا ضروری ہوتا ہے۔ میرا نہیں خیال کہ لوگوں کو اس کی سمجھ ہے۔