محکمہ کھیل کے زیر اہتمام بلوچستان میں یوم پاکستان کی مناسبت سے کھیلوں کے مقابلے جاری

محکمہ کھیل کے زیر اہتمام بلوچستان میں یوم پاکستان کی مناسبت سے کھیلوں کے مقابلے جاری ہیں۔

محکمہ کھیل حکومت بلوچستان کے زیر اہتمام صوبہ بھر میں جاری سپورٹس فیسٹول یوم پاکستان کی مناسبت سے کھیلوں کے مقابلے جاری ہیں، ان میں شامل فٹسال ٹورنامنٹ، ووشو ٹورنامنٹ اور باسکٹ بال کے مقابلوں کا بھی آغاز ہوگیاہے۔

 فٹسال ٹورنامنٹ کا آغاز کوئٹہ کے علاقے سیٹلائٹ ٹاؤن کیو ڈی اے گراؤنڈ میں ہوا، افتتاحی تقریب کے مہمان خصوصی پاکستان پیپلز پارٹی کے رہنما رکن اسمبلی پارلیمانی سیکرٹری لیاقت علی لہڑی تھے جبکہ باسکٹ بال کے مقابلے پاکستان سپورٹس بورڈ کوئٹہ سینٹر میں ہوگئے ہیں، جس کا افتتاح بلوچستان اولمپک ایسوسی ایشن کے جنرل سیکرٹری شیر محمد ترین نے کیا۔

 ووشو کے مقابلے ایوب سپورٹس کمپلیکس مارشل آرٹس جمنازیم میں شروع ہوئے ہیں، باسکٹ بال کے مقابلوں میں کوئٹہ کے 6 ٹیموں نے حصہ لیا ہے جبکہ ووشو کے مقابلوں کی 7 مختلف ویٹ کیٹیگریز ہیں، کوئٹہ سے 35 کھلاڑیوں نے حصہ لیا ہے۔

  فٹسال ٹورنامنٹ کے مہمان خصوصی میر لیاقت علی لہڑی نے باقاعدہ طور پر ٹورنامنٹ کا افتتاح کیا اس موقع پر آرگنائزنگ کمیٹی کے ممبر عبدالباقی ، محمد صادق سمیت تماشائی بھی بڑی تعداد میں موجود تھے، افتتاحی تقریب کے موقع پر مہمان خصوصی کو کھلاڑیوں سے خصوصی تعارف بھی کرایا گیا۔

 لیاقت علی لہڑی نے سپورٹس جرنلسٹس سے بات چیت کرتے ہوئے کہا ہے کہ 23 مارچ یوم پاکستان کی مناسبت سے سپورٹس فیسٹول کا انعقاد خوش آئند ہے، اس سے کھلاڑیوں کو کھیلنے کے مواقع میسر آئیں گے، بلوچستان حکومت کھیلوں کے فروغ اور کھلاڑیوں کو کھیلنے کے مواقع فراہم کے لیے کوشاں ہے۔

 انہوں نے کہا ہے کہ کیو ڈی اے گراؤنڈ میں مصنوعی گراس لگانے کےلیے آئندہ مالی سال کے پی ایس ڈی میں شامل کریں گے، صوبے میں امن و امان کی مخدوش صورتحال کے باوجود تماشائیوں کی بڑی تعداد کا میچ دیکھنے کے لیے گراؤنڈ میں آنا قابل تحسین ہے۔

لیاقت علی لہڑی کا مزید کہنا تھا کہ اپنے نوجوانوں کو کھیلوں کی طرف راغب کرینگے تاکہ وہ منشیات جیسی لعنت سے بچ سکے اور کھیلوں میں حصہ لیکر اپنے ملک اور صوبے کا نام روشن کریں۔

انہوں نے کہا کہ علاقے میں نوجوانوں کے لیے مزید گراؤنڈز بھی بنائیں گے، فٹسال مقابلوں کا انعقاد 22 مارچ تک جاری رہیں گے۔ ووشو ایونٹ کے فائنل مقابلے آج مارشل آرٹس جمنازیم ایوب سپورٹس کمپلیکس میں ہونگے۔