چیمپئنز ٹرافی سے پی سی بی کو ریکارڈ کتنا منافع ہوا؟ کرکٹ بورڈ کا بیان سامنے آگیا

چیمپئنز ٹرافی سے حاصل ریونیو پر پاکستان کرکٹ بورڈ کا موقف سامنے آگیا۔

پی سی بی چیئرمین کے مشیر عامر میر اور  چیف فنانشل افسر (سی ایف او) جاوید مرتضیٰ نے لاہور میں پریس میں کہا دو ارب روپے منافع کا تخمینہ لگایا گیا لیکن تین ارب روپے منافع کا تخمینہ ہے ہمیں توقع سے زیادہ منافع ہوا۔

عامر میر نے کہا بھارتی میڈیا کا پروپیگنڈا بے نقاب کرنا ہے جو اس وقت کیا جا رہا ہے، پاکستان دشمن میڈیا ایک جھوٹ کی دکان چلا رہے ہیں، افسوس کی بات ہے کہ پاکستانی میڈیا نے بھی یہ چلایا ہے۔

عامر میر کا کہنا تھا یہ منافع گیٹ منی اور گراؤنڈ فیس سے حاصل ہوا ہے، پی سی بی کی طرف سے آئی سی سی چیمپئنز ٹرافی کا کوئی پیسہ نہیں تھا۔

انہوں نے کہا کہ ابھی سب آڈٹ ہوگا لیکن اس کے باوجود تین ارب کے منافع کا تخمینہ لگایا ہے، پی سی بی نے چار ارب روپے حکومت کو ٹیکس دیا، آئی سی سی نے تمام اخراجات اٹھائے، 70 ملین ڈالرز کا آئی سی سی نے بجٹ بنایا تھا۔