عرفان پٹھان کو آئی پی ایل کمنٹری پینل سے باہر کردیا، مگر کیوں؟

سابق بھارتی آل راؤنڈر عرفان پٹھان کو رواں سال انڈین پریمیئر لیگ (آئی پی ایل)  کے کمنٹری پینل سے بااہر کردیا گیا۔

میڈیا رپورٹس کے مطابق ریٹائرمنٹ کے بعد آئی پی ایل کمنٹری پینل کے ایک مستقل رکن رہنے والے عرفان پٹھان کو اس سال سیزن کے کمنٹری پینل میں شامل نہیں کیا گیا۔

عرفان پٹھان ہفتہ کو کولکتہ نائٹ رائیڈرز اور رائل چیلنجرز بنگلورکے درمیان آئی پی ایل 2025 کے افتتاحی میچ کے دوران بھی کہیں نظر نہیں آئے تھے۔

رپورٹ میں بتایا گیا کہ سابق بھارتی آل راؤنڈر کو کمنٹری پینل سے باہر اس لیے کیا گیا کیونکہ براڈکاسٹرز عرفان پٹھان کی جانب سے ذاتی رنجشوں کو کمنٹری اور سوشل میڈیا پر لانے سے خوش نہیں۔

عرفان پٹھان کا چند کھلاڑیوں کے ساتھ کچھ سال قبل پہلے اختلاف ہوا تھا، تب سے وہ کمنٹری یا سوشل میڈیا پر نام لیے بغیر ان کا ذکر کرتے رہتے ہیں۔

اس کے علاوہ رپورٹ میں یہ بھی بتایا گیا کہ عرفان پٹھان  پر کھلاڑیوں پر طنز کرنے کا الزام لگایا گیا اور اسی وجہ سے انہیں آئی پی ایل 2025 کے کمنٹری پینل سے باہر کیا گیا۔

واضح رہے کہ عرفان پٹھان پہلے کرکٹر نہیں جنہیں کمنٹری کی ذمہ داریوں سے ہٹایا گیا بلکہ 2020 میں سابق بھارتی کرکٹر سنجے منجریکر کو ون ڈے ورلڈ کپ کے دوران رویندرا جڈیجہ پر تبصرے کے باعث کمنٹری پینل سے ہٹایا گیا تھا۔

2016 میں معروف کمنٹیٹر ہرشا بھوگلے کو بھی آئی پی ایل کے کمنٹری پینل میں شامل نہیں کیا گیا تھا۔