ابرار احمد کا آؤٹ کرنے کے بعد جشن منانے والا اسٹائل چھوڑنے کا اعلان؛ وجہ بھی بتادی

پاکستان کے مسٹری بولر ابرار احمد نے آؤٹ کرنے کے بعد جشن منانے والا اسٹائل چھوڑنے کا اعلان کرتے ہوئے اس کی وجہ بھی بتادی۔

چیمپئنز ٹرافی میں بھارت کے شبمن گل کو آؤٹ کرنے بعد ابرار احمد نے جب سر ہلا کر باہر جانے کا اشارہ کیا تو اس پر خاصا شور ہوا۔

لاہور میں میڈیا سے گفتگو کرتے ہوئے انہوں نے کہا کہ میں نے پی ایس ایل کے پچھلے ایڈیشن میں سیلیبریشن اسٹائل شروع کیا، ساؤتھ افریقا میں بھی سر ہلاتا تھا، لیکن کوئی مسئلہ نہیں ہوا۔

ان کا کہنا تھا کہ چیمپئنز ٹرافی میں بھارت کے خلاف میچ میں کچھ زیادہ مسئلہ ہو گیا، میرا ارادہ تھا کہ میں اپنے اسٹائل کو جاری رکھوں گا لیکن شاید کچھ لوگوں کو اچھا نہیں لگ رہا تھا، میں کسی کی دل آزاری نہیں کرنا چاہتا اس لیے میں نے کہا کہ یہ اسٹائل چھوڑ دیتا ہوں۔

انہوں نے کہا کہ مجھے نئے بال کے ساتھ ڈیتھ اور مڈل اوورز میں بھی بولنگ کرنا ہوتی ہے، اس لیے میں نے مہارت کو بہتر بنانے کے لیے کام کیا جس کا فائدہ ہو رہا ہے، کوئٹہ گلیڈی ایٹرز کی ٹیم بہت اچھی ہے، ایک جیت سے مومنٹم بن جائے گا، ویوین رچرڈز لیجنڈ ہیں ان کے الفاظ ہمارے لیے بڑی اہمیت رکھتے ہی ، وہ ہمیں متحرک رکھتے ہیں۔

ابرار احمد کا کہنا تھا کہ مارک چیپمین کو یہاں کنڈیشنز کا علم ہے، انہوں نے بہت رنز کیے ہیں امید ہے مارک چیپمین اسی طرح رنز کریں گے جیسے کہ وہ کرتے آ رہے ہیں۔

بولر نے مزید کہا کہ مجھے تینوں فارمیٹ کا بہترین بولر بننا ہے اس کے لیے فٹنس کو مزید بہتر بناؤں گا جبکہ مجھے اندازہ ہے کہ بیٹنگ میں اچھا کرنا بہت ضروری ہے، اگلے چھ ماہ میں بیٹنگ پر کام کروں گا۔