کوئٹہ گلیڈی ایٹرز کی پشاور زلمی کو 64 رنز سے شکست

پاکستان سپرلیگ کے 17ویں میچ میں کوئٹہ گلیڈی ایٹرز نے فہیم اشرف کی بولنگ کی بدولت پشاور زلمی کو 64 رنز سے شکست دے دی۔

قذافی اسٹیڈیم لاہور میں پشاور زلمی اور کوئٹہ گلیڈی ایٹرز کے درمیان میچ میں زلمی کے کپتان بابر اعظم نے ٹاس جیت کر پہلے فیلڈنگ کا فیصلہ کیا۔

کوئٹہ گلیڈی ایٹرز نے پہلے بیٹنگ کرتے ہوئے مقررہ بیس اوورز میں 7 وکٹوں کے نقصان پر 178 رنز بنائے۔ مارک 33 جبکہ مینڈس اور سعود شکیل 32، 32 رنز بناکر نمایاں بلے باز رہے۔

زلمی کے جوزف نے تین جبکہ صائم ایوب نے دو اور لک ووڈ نے ایک وکٹ حاصل کی۔

ہدف کے تعاقب میں پشاور زلمی نے بیٹنگ کا آغاز کیا تو صائم ایوب 17 کے مجموعی اسکور پر صرف 7 رنز بناکر فہیم اشرف کا شکار بنے، اس کے بعد محمد عامر نے بابر اعظم کو 12 رنز اپنا شکار بنا کر پویلین بھیجا، یوں زلمی کو 21 پر دوسرے نقصان کا سامنا کرنا پڑا۔

زلمی کے حسین طلعت کے علاوہ کوئی بھی کھلاڑی گلیڈی ایٹرز کے بولرز کے آگے زیادہ دیر تک وکٹ پر نہ ٹک سکا اور وہ 39 رنز بناکر نمایاں بلے باز رہے۔

گلیڈی ایٹرز کے فہیم اشرف نے شاندار بولنگ کرتے ہوئے 3.2 اوورز میں 33 رنز دے کر 5 کھلاڑیوں کو پویلین کی راہ دکھائی۔ جبکہ خرم شہزاد 2، محمد عامر، ابرار اور محمد وسیم نے ایک ایک وکٹ حاصل کی۔