ویرات کوہلی اور انوشکا شرما نے بھارت کیوں چھوڑا؟ وجہ سامنے آگئی

بھارتی کرکٹر ویرات کوہلی اور اہلیہ انوشکا شرما کے بھارت چھوڑنے کی وجہ سامنے آگئی ہے۔

بالی ووڈ کی معروف اداکارہ انوشکا شرما اور بھارت کے نامور کرکٹر ویرات کوہلی کی لندن منتقلی کی اصل وجہ بالاخر منظر عام پر آ گئی ہے۔ یہ کوئی معمولی پیشہ ورانہ فیصلہ نہیں بلکہ ایک ایسی خواہش ہے جو ہر مشہور شخصیت کے دل میں ہوتی ہے لیکن وہ اسے ظاہر نہیں کر پاتے، اور وہ ہے "عام زندگی” گزارنے کی خواہش۔

یہ انکشاف اداکارہ مادھوری ڈکشٹ کے شوہر ڈاکٹر سری رام نینے نے اپنے ایک پوڈکاسٹ میں انوشکا سے ہونے والی ذاتی گفتگو کا ذکر کرتے ہوئے کیا۔ ڈاکٹر سری رام نے بتایا کہ انوشکا اور ویرات نے بھارت میں اپنی شہرت اور مسلسل عوامی توجہ سے تنگ آ کر لندن منتقل ہونے کا فیصلہ کیا۔ ان کا کہنا تھا کہ ’’وہ چاہتے تھے کہ ان کے بچے ایک عام ماحول میں پرورش پائیں، جہاں ہر چھوٹی حرکت پر کیمروں کا فلیش نہ چمکے۔‘‘

انہوں نے بتایا کہ بھارت میں رہتے ہوئے یہ مشہور جوڑا اپنی نجی زندگی کے معمول ترین لمحوں سے بھی لطف اندوز نہیں ہو پاتا تھا۔ ’’اگر انہیں باہر کھانے جانا ہو، پارک میں سیر کرنی ہو یا بچوں کے ساتھ وقت گزارنا ہو، ہر جگہ انہیں مداحوں اور میڈیا کے ہجوم کا سامنا کرنا پڑتا تھا۔‘‘ یہی وجہ ہے کہ انوشکا اور ویرات نے لندن کو اپنا مستقل گھر بنانے کا فیصلہ کیا، جہاں وہ زیادہ پرائیویسی کے ساتھ زندگی گزار سکیں۔

یہ جوڑا 2013 میں ایک کمرشل شوٹ کے دوران ملا تھا اور 2017 میں انہوں نے ایک نجی تقریب میں شادی کی تھی۔ ان کی بیٹی وامیکا 2021 میں پیدا ہوئی تھی، جبکہ فروری 2024 میں ان کے بیٹے اکائے کی پیدائش ہوئی۔ ڈاکٹر نینے کے مطابق، ’’یہ فیصلہ جذباتی تھا لیکن اس کے پیچھے ایک واضح سوچ تھی، یعنی اپنے بچوں کو ایک متوازن اور خوشگوار زندگی دینا۔‘‘