پی ایس ایل 10 کے بقیہ میچز کہاں پر ہوں گے؟ بڑا فیصلہ ہو گیا

پاک بھارت کشیدگی کے باعث پی ایس ایل 10 کو دبئی منتقل کرنے کا فیصلہ کرلیا گیا ہے۔

پاکستان کرکٹ بورڈ ( پی سی بی) کی جانب سے جاری کردہ اعلامیہ کے مطابق پی ایس ایل 10 کے باقی تمام میچز متحدہ عرب امارات (یو اے ای) منتقل کر دیے گئے ہیں اور ان میں وہ 8 میچز شامل ہیں جو راولپنڈی، ملتان اور لاہور میں کھیلے جانے تھے جبکہ نئے شیڈول کا اعلان جلد کر دیا جائے گا۔

اعلامیہ کے مطابق چیئرمین محسن نقوی نے کہا کہ پی سی بی کا ہمیشہ سے مؤقف رہا ہے کہ کھیل اور سیاست کو الگ رکھنا چاہیے تاہم، راولپنڈی کرکٹ اسٹیڈیم کو نشانہ بنا کر بھارت نے انتہائی غیر ذمہ دارانہ اور خطرناک اقدام کیا ہے جس کا مقصد ایچ بی ایل پی ایس ایل 10 کو متاثر کرنا تھا۔

انہوں نے کہا کہ اس پس منظر میں پی سی بی نے فیصلہ کیا ہے کہ باقی میچز یو اے ای منتقل کیے جائیں تاکہ مقامی اور غیر ملکی کھلاڑیوں جو ہمارے معزز مہمان ہیں ان کو کسی ممکنہ بھارتی جارحیت سے محفوظ رکھا جا سکے۔

محسن نقوی نے کہا کہ ایک ذمہ دار ادارے کی حیثیت سے جس نے ہمیشہ مشکل حالات کا مقابلہ کیا ہے اور کرکٹ کی ترقی کو یقینی بنایا ہے ہمارے لیے ضروری تھا کہ ہم کھلاڑیوں کی ذہنی صحت کا خیال رکھیں۔

چیئرمین پی سی بی محسن نقوی نے کہا کہ جیسے ماضی میں ویسے ہی اب بھی ہمارے تمام شراکت دار اور شائقین ہمارے ساتھ کھڑے ہوں گے اور پی ایس ایل کی کامیابی کے لیے اپنا کردار ادا کریں گے۔