جنگ بندی کے بعد بنگلا دیش کرکٹ ٹیم کے دورہ پاکستان کا امکان روشن

جنگ بندی کے اعلان کے بعد بنگلا دیش کرکٹ ٹیم کے دورہ پاکستان کا امکان روشن ہوگیا۔ بنگلادیشی کرکٹ بورڈ نے دورے کے لیے گرین سگنل دے دیا۔

پاکستان کے خلاف ٹی ٹوئنٹی سیریز کے5 میچز 25 مئی سے 3 جون تک فیصل آباد میں کھیلے جائیں گے۔ اس سے قبل بنگلا دیشی ٹیم شارجہ کرکٹ اسٹیڈیم میں متحدہ عرب امارات کے خلاف دو ٹی ٹوینٹی میچز 17 اور 19 مئی کو کھیلے گی۔

بنگلادیشی کرکٹ بورڈ نے اپنے اعلامیہ میں کہا تھا کہ آئندہ دورہ پاکستان کے حوالے سے بات چیت جاری ہے۔ کھلاڑیوں اور معاون عملے کی حفاظت اور تحفظ بورڈ کی اولین ترجیح ہے اوردورے سے متعلق تمام فیصلے پاکستان کی موجودہ صورتحال کو مدنظر رکھتے ہوئے کیے جائیں گے۔

ذرائع کے مطابق بنگلا دیشی کرکٹ بورڈ نے پاکستان اور بھارت کے درمیان سرحدی کشیدگی کے بعد آئی پی ایل اور پی ایس ایل کے التوا کو دیکھتے ہوئے دورہ کا فیصلہ موخر کردیا تھا۔

بنگلا دیشی بورڈ کے ڈائریکٹرز نے ہفتہ کو شیر بنگلا نیشنل کرکٹ اسٹیڈیم میں صورت حال پر غور کے بعد میزبان کرکٹ بورڈ سے تبادلہ خیال کیا۔

دریں اثنا پی سی بی کے ترجمان نے دورہ کے حوالے سے دونوں ممالک کے  بورڈز کے درمیان رابطہ کی تصدیق کرتے ہوئے کہا کہ جنگ بندی کے اعلان کے بعد سامنے آنے والی صورتحال کے مطابق فیصلہ سامنے آئے گا۔

واضح رہے ابتدائی شیڈول کے مطابق بنگلادیشی کرکٹ ٹیم  کی 21 مئی کو پاکستان آمد طے ہے۔