معروف بھارتی کرکٹر میچ کھیلتے ہوئے دل کا دورہ پڑنے کے باعث جان کی بازی ہار گیا

بھارتی پنجاب کے ضلع فیروزپور میں کرکٹ میچ کے دوران ایک نوجوان کھلاڑی دل کا دورہ پڑنے کے باعث جان کی بازی ہار گیا۔

بھارتی پنجاب کے ضلع فیروزپور میں کرکٹ میچ کے دوران ایک نوجوان کھلاڑی دل کا دورہ پڑنے کے باعث جان کی بازی ہار گیا، سوشل میڈیا پر وائرل ہونے والی ویڈیو کے مطابق متوفی کی شناخت ہرجیت سنگھ کے نام سے ہوئی ہے جو ڈی اے وی اسکول گراؤنڈ میں کرکٹ میچ کھیل رہا تھا۔

ویڈیو میں دیکھا جا سکتا ہے کہ ہرجیت سنگھ نے ایک چھکا مارا اور رن لینے کے لیے دوڑا، تاہم دوڑتے ہوئے اسے سینے میں تکلیف محسوس ہوئی جس پر وہ زمین پر بیٹھ گیا۔ چند لمحوں بعد وہ اچانک گر پڑا۔ اس کے ساتھی کھلاڑی فوری طور پر اس کے قریب آئے اور اسے ہوش میں لانے کے لیے موقع پر ہی سی پی آر (CPR) دینے کی کوشش کی، لیکن بدقسمتی سے وہ بے ہوش ہی رہا اور کسی قسم کا ردِعمل نہ دیا۔

ابتدائی اطلاعات کے مطابق ہرجیت سنگھ کو کارڈیک اریسٹ ہوا جس نے موقع پر ہی اس کی جان لے لی۔ یہ افسوسناک واقعہ اس حقیقت کو اجاگر کرتا ہے کہ دل کی بیماریاں اب صرف عمر رسیدہ افراد تک محدود نہیں رہیں بلکہ نوجوان، حتیٰ کہ 20 سال کی عمر کے افراد بھی ان کی لپیٹ میں آرہے ہیں۔

 ماہرین کے مطابق طرزِ زندگی، ذہنی دباؤ، ناقص غذا اور جسمانی سرگرمیوں کی کمی جیسے عوامل اس تشویشناک رجحان کی بڑی وجوہات بن رہے ہیں۔