رونالڈو ہمیشہ کیلئے سعودی عرب میں رہنے کے خواہشمند

پرتگال سے تعلق رکھنے والے فٹ بال کے کھلاڑی اور سعودی کلب النصر کی نمائندگی کرنے والے کرسٹیانو رونالڈو نے ہمیشہ کیلئے سعودی عرب میں رہنے کی خواہش کا اظہار کیا ہے۔

 چند روز قبل رونالڈو نے سعودی کلب النصر سے مزید 2 سال کا معاہدہ کیا جس کے بعد وہ اب 2027 تک سعودی عرب کے النصر کلب کا حصہ رہیں گے۔

النصر کلب کی جانب سے یوٹیوب پر جاری کی گئی ایک ویڈیو میں فٹ بال کے کھلاڑی نے کہا کہ وہ باقی زندگی سعودی عرب میں گزارنا چاہتے ہیں۔

ان کا کہنا تھا کہ یہ وہ ملک ہے جہاں وہ اور ان کی فیملی اپنے گھر جیسا محسوس کرتے ہیں۔

انہوں نے کہا کہ میری فیملی ہمیشہ میرے فیصلوں کی حمایت کرتی ہے اور ہم سعودی عرب میں خوش ہیں، لوگ ہم سے انتہائی گرم جوشی سے پیش آتے ہیں، اسی لیے ہم اپنی زندگی یہاں گزارنا چاہتے ہیں۔

واضح رہے کہ کرسٹیانو رونالڈو کا پہلی بار 2022 میں سعودی عرب کے النصر کلب کے ساتھ معاہدہ ہوا تھا۔