سابق آسٹریلوی کپتان مائیکل کلارک جلد کے کینسر میں مبتلا ہوگئے

سڈنی: جلد کے کینسر میں مبتلا سابق آسٹریلوی کپتان مائیکل کلارک نے مداحوں کے نام پیغام جاری کردیا۔

سوشل میڈیا پلیٹ فارم ایکس پر پیغام میں انھوں نے لکھا کہ جلد کا کینسر خاص طور پر آسٹریلیا میں ایک حقیقت ہے، میرے ناک پر ایک اور کٹ پڑ گیا ہے۔

مائیکل کلارک نے مداحوں کے نام پیغام میں کہا کہ دوستانہ مشورہ ہے کہ اپنی جلد کا معائنہ کراتے رہیں، احتیاط علاج سے بہتر ہے۔

انھوں نے بتایا کہ میرے کیس میں باقاعدگی سے چیک اپ اور جلد تشخیض اہم ہے۔

یاد رہے کہ سابق کرکٹر کو چند برس قبل جلد کے کینسر کی علامات ظاہر ہوئی تھیں تاہم مائیکل کلارک کی جانب سے  جلد کے کینسر کا فوری انکشاف نہیں کیا گیا تھا۔