معروف سابق فاسٹ بولر چل بسے

سابق انگلش فاسٹ بولر کین شٹل ورتھ انتقال کر گئے۔

ون ڈے کرکٹ میں انگلینڈ کی جانب سے پہلی وکٹ لینے والے سابق فاسٹ بولر کین شٹل ورتھ 80 برس کی عمر میں انتقال کر گئے۔ برطانوی میڈیا کے مطابق ان کا انتقال رواں ماہ کے آغاز میں ہوا، جبکہ گزشتہ ہفتے لنکا شائر کاؤنٹی کلب نے ان کے انتقال کی تصدیق کرتے ہوئے باضابطہ بیان جاری کیا۔

کین شٹل ورتھ نے 1970 سے 1971 کے دوران انگلینڈ کی نمائندگی کرتے ہوئے پانچ ٹیسٹ اور ایک ون ڈے میچ کھیلا۔ وہ 1970-71 کے تاریخی دورۂ آسٹریلیا کے دوران ایشز جیتنے والی انگلش ٹیم کا حصہ بھی تھے۔

اپنے فرسٹ کلاس کیریئر میں انہوں نے لنکا شائر کے لیے 484 وکٹیں جبکہ لیسٹر شائر کی جانب سے کھیلتے ہوئے مزید 99 وکٹیں حاصل کیں۔ دائیں ہاتھ کے اس فاسٹ بولر کو ان کے لمبے رن اپ، سائیڈ آن بولنگ ایکشن اور تیز رفتاری کے باعث خاصی شہرت حاصل ہوئی۔

کین شٹل ورتھ کو یہ اعزاز بھی حاصل ہے کہ انہوں نے 1971 میں آسٹریلیا کے خلاف کھیلے گئے ون ڈے کرکٹ کی تاریخ کے پہلے میچ میں انگلینڈ کی جانب سے پہلی ون ڈے وکٹ حاصل کی تھی۔

کرکٹ سے ریٹائرمنٹ کے بعد انہوں نے امپائرنگ کے شعبے میں بھی خدمات انجام دیں اور بعد ازاں انہیں 2021 میں لنکا شائر کے ہال آف فیم میں شامل کیا گیا۔ کین شٹل ورتھ کی کرکٹ کے لیے خدمات کو ہمیشہ یاد رکھا جائے گا۔