سہ ملکی سیریز: پاکستان کی یو اے ای کو 31 رنز سے شکست، فائنل کیلئےکوالیفائی

سہ ملکی ٹی ٹوینٹی سیریز کے پانچویں میچ میں پاکستان نے یو اے ای کو 31 رنز  کےمارجن سے ہرا کر فائنل کے لیے کوالیفائی کرلیا۔

شارجہ میں کھیلے گئے میچ میں پاکستان نے متحدہ عرب امارات کے خلاف ٹاس جیت کر بیٹنگ کا فیصلہ کیا۔

پہلے بیٹنگ کرتے ہوئے پاکستان ٹیم نے مقررہ 20 اوور میں 5 وکٹ کے نقصان پر 171 رنز بنائے۔

پاکستان کی جانب سے فخر زمان 44 گیندوں پر 77 رنز بنا کر ناقابل شکست رہے۔ محمد نواز  بھی 37  رنز  بنا کر ناٹ آؤٹ رہے۔

ان کے علاوہ صاحبزادہ فرحان نے 16 اور صائم ایوب نے 11 رنز بنائے۔

 متحدہ عرب امارات کی جانب سے حیدر علی نے 17 رنز دے کر 2 وکٹیں حاصل کیں۔

پاکستان کے 172 رنز کے ہدف کے جواب میں  یو اے ای کی ٹیم 7 وکٹ پر 140 رنز  بناسکی۔

یو اے ای کی جانب سے علی شان 61 اور محمد وسیم 19 رنز بناکر نمایاں رہے۔پاکستان کی جانب سے  ابرار احمد نے 4 کھلاڑیوں کو  آؤٹ کیا۔

یوا ے ای کی شکست کے بعد افغانستان نے بھی فائنل میں جگہ بنالی ہے۔