گلگت بلتستان میں پاک فوج کے زیرِ اہتمام پہلی نیشنل سرفرنگاہ میراتھن 2025 کا کامیاب انعقاد

21 کلو میٹر کی اس میراتھن میں پورے پاکستان سے ایک ہزار ایتھلیٹس نے حصہ لیا، جن میں گلگت بلتستان کے کھلاڑیوں کے ساتھ ساتھ غیر ملکی ایتھلیٹس بھی شامل تھے۔

سرفرنگا میراتھن نے نہ صرف کھیلوں بلکہ ایڈونچر ٹورازم کو بھی نئی پہچان دی۔ ملکی و غیر ملکی سیاحوں نے اس ایونٹ کو یادگار قرار دیا اور کہا کہ ایسے ایونٹس علاقے میں صحت مند سرگرمیوں اور سیاحت کے فروغ کے ضامن ہیں۔

اختتامی تقریب کے مہمانِ خصوصی گورنر گلگت بلتستان سید مہدی شاہ تھے، جنہوں نے نمایاں کارکردگی دکھانے والے ایتھلیٹس میں انعامات تقسیم کیے۔ میراتھن میں پہلی پوزیشن حاصل کرنے والے ایتھلیٹ کو چھ لاکھ روپے نقد دیے گئے۔ مجموعی طور پر چالیس لاکھ روپے کے انعامات، ٹرافیاں اور شیلڈز تقسیم کی گئیں۔

اس کے علاوہ پہلے 50 نمایاں کارکردگی دکھانے والے ایتھلیٹس کو سرٹیفکیٹس اور  نقد انعامات دیے گئے، جن میں سے 26 کھلاڑیوں کا تعلق گلگت بلتستان کے مختلف علاقوں سے تھا۔

شرکاء اور مقامی عوام نے پاک فوج کا شکریہ ادا کرتے ہوئے کہا کہ ایسے ایونٹس نوجوانوں کی صلاحیتوں کو اجاگر کرنے، صحت کو فروغ دینے، اور سیاحت کو ترقی دینے کا بہترین ذریعہ ہیں اور امید ظاہر کی کہ آئندہ بھی اس طرح کی سرگرمیوں کا سلسلہ جاری رہے گا۔