انسانی اسمگلرز نے جعلی فٹبال ٹیم بنا کر سیالکوٹ سے جاپان پہنچا دی

اسلام آباد: انسانی اسمگلرز نے زمینی راستوں پر سختی کے بعد نیا طریقہ واردات اپناتے ہوئے جعلی فٹبال ٹیم بنا کر جاپان پہنچادی۔

وفاقی تحقیقاتی ایجنسی (ایف آئی اے) کے مطابق 22 افراد پر مشتمل جعلی فٹبال ٹیم کو سیالکوٹ ایئرپورٹ سے جاپان پہنچا یا گیا جہاں جاپان نے جعلی دستاویزات ثابت ہونے پر تمام افراد کو واپس ڈی پورٹ کر دیا اور اسکینڈل میں ملوث ملزم ملک وقاص کو گرفتار کرلیا گیا۔

ایف آئی اے کا کہنا ہے کہ تھانہ ایف آئی اے گوجرانوالہ میں واقعے کا مقدمہ بھی درج کرلیا گیا۔ ایف آئی اے کے مطابق تمام افراد کو فٹ بال ٹیم کے کھلاڑیوں کی طرح تربیت دی گئی، ملزم نے 22 افراد سے فی کس 40 لاکھ روپے وصول کیے۔

ایف آئی اے نے بتایاکہ ملزم نے فٹ بال فیڈریشن کی جعلی رجسٹریشن دستاویزات بنائیں، جعلی دستاویزات کے مطابق ملزمان کے جاپان میں فٹ بال میچ شیڈول تھے۔

ملزم نے وزارت خارجہ کے جعلی کاغذات بھی تیار کیے تھے،  22 افراد نے فٹ بال ٹیم کے روپ میں سیالکوٹ ائیرپورٹ سے فلائی کیا، جاپان ائیرپورٹ پر جعلی دستاویزات پکڑی گئیں۔

گرفتار ملزم نے اعتراف کیا کہ جنوری 2024 میں بھی جعلی فٹبال ٹیم میں 17 افراد کو جاپان بھجوایا تھا۔