بھارتی کھلاڑیوں کا ایشیاکپ میں نامناسب رویہ، بھارتی بورڈ عہدیدار نئی کہانی سامنے لے آئے

دبئی میں ایشیا کپ میں پاک بھارت اہم میچ میں بھارتی کھلاڑیوں نے نامناسب رویہ اپنائے رکھا۔ تنقید بڑھی تو بے مقصد جواب دے کر جان چھڑانے کی کوشش کی گئی۔

اول تو بھارتی کپتان سوریا کمار نے ٹاس کے موقع پر پاکستانی کپتان سے ہاتھ نہیں ملایا دوسرا میچ ختم ہونے کے بعد پاکستانی کھلاڑیوں سے روایت کے مطابق ہاتھ نہ ملاکر اسپورٹس مین اسپرٹ کی بھی دھجیاں اڑا دیں۔

قبل چند روز پہلے دبئی اسٹیڈیم میں بھارتی کپتان سوریا کمار یادو نے پاکستان کرکٹ بورڈ کے چیئرمین محسن نقوی سے ہاتھ ملایا تھا جس پر بھارت میں انھیں کڑی تنقید اور سوشل میڈیا پر شدید ردعمل کا سامنا کرنا پڑا تھا۔

اس معاملے پر بی سی سی آئی آفیشل کا بیان سامنے آگیا بی سی سی آئی کے سینئر عہدیدار نے بیان میں کہا کہ اس قسم کا کوئی قانون نہیں جو کھلاڑیوں کو زبردستی مخالف ٹیم سے ہاتھ ملانے پر مجبور کرے۔

بھارتی نیوز ایجنسی سے گفتگو کرتے ہوئے ان کا کہنا تھا دیکھیے اگر آپ کھیل کے قوانین کے حساب سے دیکھیں تو اس میں ایسا کچھ نہیں ہے کہ اپوزیشن سے ہاتھ ملانا ضروری ہے۔

بی سی سی آئی آفیشل کا کہنا تھا کہ یہ ایک جذبہ خیر سگالی اور ایک طرح کا کنونشن ہے، قانون نہیں، جس پر دنیا بھر میں کھیلوں کے میدان میں عمل کیا جاتا ہے۔

انھوں نے مزید کہا کہ اگر اس قسم کا کوئی قانون ہے ہی نہیں تو بھارت کرکٹ ٹیم کسی ایسی اپوزیشن سے ہاتھ ملانے کی پابند نہیں ہے جس کے ساتھ تعلقات کشیدہ ہونے کی تاریخ رہی ہو۔