سلمان علی آغا نے رنر اپ کا چیک وصول کرکے کیوں پھینکا؟ حقیقت سامنے آگئی

ایشیا کپ 2025 کے فائنل میں پاکستانی کپتان سلمان علی آغا کی جانب سے رنرز اپ چیک پھینکنے کی حقیقت سامنے آگئی۔   

ایشیا کپ 2025 کے فائنل میں پاکستان کو بھارت کے ہاتھوں سنسنی خیز مقابلے کے بعد شکست کا سامنا کرنا پڑا، جس کے بعد پاکستانی کپتان سلمان علی آغا کی جانب سے رنرز اپ چیک پھینکنے کی ویڈیو سوشل میڈیا پر وائرل ہوگئی اور اس پر مختلف قیاس آرائیاں شروع ہو گئیں۔ تاہم اب اس واقعے کی اصل حقیقت منظرِ عام پر آ گئی ہے۔

بھارتی میڈیا این ڈی ٹی وی نے دعویٰ کیا کہ سلمان علی آغا نے میچ کے بعد دبئی میں ہونے والی اختتامی تقریب کے دوران رنر اپ کا چیک غصے میں اسٹیج پر پھینکا، جو بھارتی مہمان کی "توہین” کے مترادف ہے۔ ان کے مطابق پاکستانی کپتان کا یہ رویہ بھارتی ٹیم کی جانب سے ٹرافی نہ لینے کے فیصلے کا ردعمل تھا۔

تاہم بعد ازاں تحقیق سے یہ بات سامنے آئی کہ جس شخصیت کو بھارتی مہمان سمجھا گیا، وہ درحقیقت بنگلادیش کرکٹ بورڈ کے صدر اور ایشین کرکٹ کونسل کے نمائندے امین الاسلام تھے۔ سلمان علی آغا نے چیک کسی دانستہ غصے یا توہین آمیز انداز میں نہیں پھینکا بلکہ چیک ملنے کے فوراً بعد انہیں پریزنٹر نے اسٹیج پر آگے آنے کا کہا، جس پر انہوں نے جلدی میں چیک کو رکھنا چاہا، جو کیمرے کی زاویہ بندی کی وجہ سے "پھینکنے” کے انداز میں دکھائی دیا۔

Salman Ali agha throw s away cheque that pakistan got as a runner up of this asian cup #IndianCricket #IndiaVsPakistan pic.twitter.com/8ysbpnenrq

— NTRneel 🐲 (@TarakNTRneel) September 29, 2025

فائنل میں بھارت نے 147 رنز کا ہدف دو گیندیں قبل 5 وکٹوں کے نقصان پر حاصل کیا۔ تلک ورما کی ناقابل شکست 69 رنز کی اننگز نے پاکستان کی جیت کی امیدوں کو توڑ دیا۔ اس میچ میں پاکستان کی بھارت کے خلاف یہ تیسری مسلسل شکست تھی، جس پر کپتان سلمان علی آغا خاصے مایوس دکھائی دیے۔

میچ کے بعد گفتگو کرتے ہوئے سلمان علی آغا نے شکست کی ذمہ داری بیٹنگ لائن پر عائد کی۔ ان کا کہنا تھا کہ ٹیم بیٹنگ میں اختتامی لمحات میں بہتر کارکردگی نہ دکھا سکی، جب کہ بولنگ میں ٹیم نے بھرپور جدوجہد کی۔ انہوں نے کہا، "ہم نے اسٹرائیک گھمانے میں غلطیاں کیں اور اہم مواقع پر وکٹیں گنوائیں، یہی وجہ ہے کہ ہم قابلِ دفاع ہدف نہ دے سکے۔”

سلمان نے بھارتی ٹیم کی بولنگ کو بھی سراہا اور کہا کہ ایک موقع پر لگ رہا تھا کہ میچ ہمارے قابو میں ہے، لیکن بھارت کے بولرز نے غیر معمولی کم بیک کیا۔ ساتھ ہی انہوں نے اپنی ٹیم کی کاوشوں کو سراہتے ہوئے کہا کہ وہ اپنی ٹیم پر فخر کرتے ہیں اور مستقبل میں بہتر انداز میں واپسی کریں گے۔

ایک بھارتی نے پاکستانی کرکٹ ٹیم کے کپتان سلمان علی آغا کو چیک تھمایا تو انہوں نے چیک وصول کرنے کے بعد پھینک دیا ، اور بھارتی شخص کو اوقات یاد دلا دی ، اگر بھارتی ٹیم محسن نقوی صاحب سے ٹرافی نہیں لے سکتی تو ہم ایک انڈین سے چیک کیسے لے سکتے ہیں۔۔ pic.twitter.com/G4e5MdLN7I

— Hafiz Ahmad Numan Malik (@HafizNuman0141) September 29, 2025

واضح رہے کہ فائنل کے بعد بھارتی ٹیم کے متنازع رویے نے اختتامی تقریب کو متاثر کیا۔ اطلاعات کے مطابق بھارتی ٹیم نے پاکستان کے نگران وزیرِ اعظم محسن نقوی سے ٹرافی وصول کرنے سے انکار کر دیا، جس کے باعث تقریب تاخیر کا شکار ہوئی اور تاریخ میں پہلی بار ایشیا کپ میں فاتح ٹیم کو فوری طور پر ٹرافی نہ دی جا سکی۔ کھیل کو سیاست زدہ کرنے کے اس رویے پر شائقینِ کرکٹ کی جانب سے سخت تنقید کی جا رہی ہے۔