پاکستان کا فخر! ارشد ندیم نے اسلامک یکجہتی گیمز میں جیولن تھرو کا گولڈ میڈل جیت لیا

ریاض: پاکستان کے معروف جیولن تھرو ایتھلیٹ ارشد ندیم نے اسلامک یکجہتی گیمز میں شاندار کارکردگی کا مظاہرہ کرتے ہوئے گولڈ میڈل جیت لیا۔

مقابلے کے دوران ارشد ندیم نے پہلی باری میں 75.44 میٹر، دوسری باری میں شاندار 83.05 میٹر جبکہ تیسری تھرو میں 82.48 میٹر تک نیزہ پھینکا۔

چوتھی کوشش میں بھی انہوں نے 77.06 میٹر کی عمدہ تھرو کی، جس نے ان کی برتری مزید مضبوط کردی۔

اسی ایونٹ میں پاکستان کے محمد یاسر سلطان نے بھی بہترین کارکردگی دکھاتے ہوئے سلور میڈل اپنے نام کیا، جس سے پاکستان کی نمائندگی کرنے والے دونوں کھلاڑیوں نے ملک کا نام روشن کردیا۔

پاکستانی ایتھلیٹس کی اس شاندار کامیابی پر ملک بھر میں خوشی کی لہر دوڑ گئی ہے، جبکہ کھیلوں سے وابستہ حلقوں نے دونوں کھلاڑیوں کی محنت اور لگن کو سراہا ہے۔

وزیراعظم کی ارشد ندیم کی گولڈ اور محمد یاسر کی سلور میڈل جیتنے پر تعریف

اسلام آباد: وزیر اعظم شہباز شریف نے اسلامی یکجہتی کھیلوں میں پاکستانی جیولن ٹیم کی شاندار کارکردگی پر کھلاڑیوں کو مبارکباد دی ہے۔

انہوں نے ارشد ندیم کی گولڈ میڈل اور محمد یاسر کی سلور میڈل جیتنے پر تعریف کی اور کہا کہ یہ کھلاڑی پوری دنیا میں پاکستان اور قوم کا نام روشن کر رہے ہیں۔

ان کا کہنا تھا کہ ارشد ندیم اور محمد یاسر نے انتھک محنت اور لگن کے ساتھ کامیابی حاصل کی اور ان کی محنت کے ساتھ ساتھ کوچز کی رہنمائی نے بھی ملک و قوم کے نام کو بلند کیا ہے۔

وزیر اعظم نے امید ظاہر کی کہ یہ کامیابیاں نوجوان کھلاڑیوں کے لیے مشعل راہ ثابت ہوں گی اور پاکستان کی اسپورٹس میں مزید بہتری اور عالمی سطح پر شناخت کو فروغ دیں گی۔