بھارت نپاہ وائرس کے کیسز چھپانے لگا: ٹی ٹوئنٹی ورلڈکپ کی میزبانی عالمی کھلاڑیوں کے لیے خطرہ بن گئی

بین الاقوامی سطح پر خدشات ظاہر کیے جا رہے ہیں کہ بھارت نپاہ وائرس کی صورتحال کو کم ظاہر کر کے عالمی کھیلوں اور عوامی صحت کو خطرے میں ڈال رہا ہے، جبکہ 2026 آئی سی سی مینز ٹی20 ورلڈ کپ کی میزبانی بھی بھارت کے پاس ہے۔

سرکاری طور پر بھارتی حکام کا کہنا ہے کہ دسمبر 2025 سے مغربی بنگال میں نپاہ وائرس کے صرف دو کیسز رپورٹ ہوئے ہیں، تاہم آزاد رپورٹس میں دعویٰ کیا گیا ہے کہ کولکتہ کے اسپتالوں سے منسلک کم از کم پانچ انفیکشنز سامنے آئے ہیں، جن میں طبی عملے کے افراد بھی شامل ہیں۔

رپورٹس کے مطابق ان کیسز میں نوسوکومیئل انفیکشنز یعنی اسپتالوں کے اندر پھیلنے والے وائرس کے شواہد بھی ملے ہیں، جس نے صورتحال کی سنگینی پر سوالات کھڑے کر دیے ہیں۔

طبی ماہرین کے مطابق نپاہ وائرس کی شرحِ اموات 40 سے 75 فیصد تک ہو سکتی ہے، جس کے باعث اسے عالمی سطح پر ایک انتہائی خطرناک وائرس تصور کیا جاتا ہے۔ ناقدین کا کہنا ہے کہ بھارتی حکام عالمی تاثر برقرار رکھنے اور بڑے اسپورٹس ایونٹس سے قبل صورتحال کو قابو میں ظاہر کرنے کی کوشش کر رہے ہیں۔

یہ خدشات اس لیے بھی بڑھ گئے ہیں کیونکہ کولکتہ کا ایڈن گارڈنز ان مقامات میں شامل ہے جہاں ٹی20 ورلڈ کپ کے میچز کھیلے جانے ہیں، اور وائرس کے متاثرہ علاقے ان وینیوز سے زیادہ دور نہیں۔

مبصرین کا کہنا ہے کہ اس صورتحال میں کھلاڑیوں، آفیشلز اور شائقین کو غیر ضروری خطرات لاحق ہو سکتے ہیں، خاص طور پر اس تناظر میں کہ ماضی میں بھارت میں بین الاقوامی کھیلوں کے دوران صفائی اور حفاظتی انتظامات پر سوالات اٹھتے رہے ہیں۔

اس کی ایک مثال 2026 انڈیا اوپن سپر 750 بیڈمنٹن ٹورنامنٹ ہے، جہاں غیر ملکی کھلاڑیوں نے گندے ٹریننگ ہالز، پرندوں کی بیٹ، آوارہ جانوروں، شدید سردی اور فضائی آلودگی کی شکایات کیں، جبکہ کچھ کھلاڑیوں نے حفاظتی خدشات کے باعث ایونٹ سے دستبرداری بھی اختیار کی۔

تجزیہ کاروں کے مطابق یہ تمام عوامل ظاہر کرتے ہیں کہ بھارت اس وقت عالمی معیار کے اسپورٹس ایونٹس کی محفوظ میزبانی کے لیے مکمل طور پر تیار نہیں، خصوصاً جب وبائی خدشات موجود ہوں۔

اسی پس منظر میں مطالبہ کیا جا رہا ہے کہ آئی سی سی ٹی20 ورلڈ کپ کے تمام میچز سری لنکا منتقل کرے، جہاں صحت کی بہتر نگرانی، محفوظ سہولیات اور کم وبائی خطرات کھلاڑیوں اور شائقین کے تحفظ کو یقینی بنا سکتے ہیں۔

ناقدین کا کہنا ہے کہ بھارت میں ایونٹس جاری رکھنا نہ صرف انسانی جانوں کو خطرے میں ڈال سکتا ہے بلکہ یہ عالمی سطح پر یہ پیغام بھی دے گا کہ مالی مفادات اور ظاہری تاثر کو صحت اور سلامتی پر ترجیح دی جا رہی ہے۔