ایپل کے نئے آئی فون 17 سیریز کے ماڈلز میں بڑا مسئلہ سامنے آگیا

دنیا بھر میں ایپل کے نئے آئی فون 17 سیریز کے ماڈلز کی فروخت جاری ہے مگر چند صارفین نے ان ڈیوائسز میں خراشوں کے مسئلے کی نشاندہی کی ہے۔

 آئی فون 17، 17 پرو اور 17 پرو میکس کے چند گھنٹے مارکیٹ میں آنے کے بعد سوشل میڈیا پر صارفین نے ان ماڈلز کی تصاویر اور ویڈیوز شیئر کیں جن میں ڈیوائسز پر واضح خراشیں دیکھی جا سکتی ہیں۔

سوشل میڈیا پلیٹ فارمز پر متعدد صارفین نے شکایت کی ہے کہ یہ ماڈلز خاص طور پر اورنج اور بلیو رنگ میں جلدی خراشدار ہو جاتے ہیں۔ ایک صارف نے ایک ویڈیو شیئر کی جس میں آئی فون 17 پرو میکس کے بیک پر واضح خراشیں نظر آ رہی تھیں، جبکہ دوسرے نے آئی فون 17 ائیر کی تصویر پوسٹ کی جس میں بھی ڈیوائس پر خراش موجود تھی۔

یوٹیوب پر ایک ویڈیو میں آئی فون 17 ماڈلز کو مختلف اشیاء جیسے چاقو، اسکریو ڈرائیور، لائٹر، سکوں اور چابیوں سے آزمایا گیا، جس میں یہ بات سامنے آئی کہ خاص طور پر اورنج اور بلیو رنگ کے آئی فون 17 پرو ماڈلز خراشوں کے لیے زیادہ حساس ہیں۔

یہ مسئلہ اس دعوے کے برعکس سامنے آیا ہے جو ایپل نے پہلے کیا تھا، کہ ان ڈیوائسز کے بیک پر موجود سرامکس شیلڈ خراشوں سے تحفظ فراہم کرنے کے لیے تین گنا زیادہ مضبوط ہے۔ صارفین کی جانب سے اس مسئلے پر شکایات کے باوجود ایپل کی طرف سے ابھی تک کوئی باضابطہ جواب یا وضاحت جاری نہیں کی گئی۔