پاکستان کے کون سے 1400مقامات پر انٹرنیٹ مفت استعمال کرسکتے ہیں؟ مکمل تفصیلات سامنے آگئیں

وزیراعلیٰ پنجاب مریم نواز کی ہدایت پر صوبے بھر میں سی ایم فری وائی فائی سروس کا دائرہ کار وسیع کر دیا گیا ہے۔

 پنجاب سیف سٹیز اتھارٹی کے مطابق صرف لاہور میں اب یہ سہولت 442 مقامات پر دستیاب ہے، جہاں 5 کروڑ 80 لاکھ سے زائد صارفین نے تقریباً 1191 ٹیرا بائٹ ڈیٹا استعمال کیا ہے۔ لاہور کے علاوہ پنجاب کے 23 اضلاع میں 952 عوامی مقامات پر بھی مفت انٹرنیٹ فراہم کیا جا رہا ہے تاکہ شہریوں کو فوری اور آسان رسائی حاصل ہو سکے۔

 حکومت نے اس سروس کو خواتین کے 450 سرکاری کالجوں تک پھیلانے کا اعلان بھی کیا ہے، جس کا مقصد تعلیمی وسائل تک بہتر رسائی اور طالبات کی حفاظت کو یقینی بنانا ہے۔ اس سہولت میں جدید وائی فائی 6 ٹیکنالوجی کو متعارف کروایا گیا ہے جو تیز رفتار انٹرنیٹ اور زیادہ ہجوم والے علاقوں میں بہتر کارکردگی فراہم کرے گی۔ لاہور میں ہاٹ سپاٹس کی تعداد بھی تیزی سے بڑھ کر 230 سے 430 سے زائد ہو گئی ہے۔

 انتظامیہ نے واضح کیا ہے کہ مفت وائی فائی بنیادی اور ہنگامی ضروریات جیسے تعلیم، رابطے اور حکومتی خدمات تک رسائی کے لیے فراہم کی گئی ہے اور تفریحی مقاصد کے لیے استعمال پر فلٹرنگ اور نگرانی کا نظام نافذ کیا گیا ہے۔