موبائل سم صارفین کیلئے اہم خبر؛ عدالت کا بڑا فیصلہ

لاہور ہائیکورٹ نے غیر رجسٹرڈ سمز فوری بند کرنے کا حکم دے دیا ہے۔

لاہور ہائیکورٹ نے ملک بھر میں غیر رجسٹرڈ موبائل سمز کے فوری خاتمے کا حکم دیتے ہوئے کہا ہے کہ بغیر تصدیق شدہ سمز کی فروخت ایک سنگین مسئلہ بن چکی ہے، جس سے ملک میں افراتفری اور جرائم کو فروغ مل رہا ہے۔

عدالت نے جعلی موبائل اکاؤنٹس کے ذریعے شہریوں کو لوٹنے والے افراد کے خلاف بھی سخت قانونی کارروائی کی ہدایت کی ہے۔

عدالت نے حکم دیا ہے کہ غیر رجسٹرڈ سمز فروخت کرنے والوں کے خلاف موثر ایکشن لیا جائے، جبکہ ڈی جی این سی سی آئی اے اور پی ٹی اے کے سینئر افسر کو 6 اکتوبر کو ذاتی حیثیت میں طلب کر لیا گیا ہے۔ عدالت نے تمام غیر رجسٹرڈ سمز کی تفصیلات بھی پیش کرنے کا حکم دیا ہے۔

سماعت کے دوران عدالت نے استفسار کیا کہ ایک ملزم سے کتنی غیر تصدیق شدہ سمز برآمد ہوئیں؟ جس پر پی ٹی اے کے وکیل نے جواب دیا کہ ملزم کے قبضے سے 773 سمز برآمد ہوئی ہیں۔

 عدالت نے اس پر برہمی کا اظہار کرتے ہوئے کہا کہ یہ صورتحال ملک کے لیے تباہ کن ثابت ہو رہی ہے، اس پر فوری اور مؤثر اقدامات ناگزیر ہیں۔