بیرون ملک سے موبائل فونز لانے والوں کیلئے بڑی خوشخبری آگئی

قومی اسمبلی کی قائمہ کمیٹی برائے خزانہ کے اجلاس میں سمندر پار پاکستانیوں کے لیے سال میں ایک استعمال شدہ موبائل فون رعایتی ٹیکس کے ساتھ اپنے گھر بھیجنے کی تجویز سامنے آئی ہے۔

اجلاس کمیٹی کے چیئرمین نوید قمر کی زیر صدارت منعقد ہوا۔ اجلاس میں وزیرِ خزانہ محمد اورنگزیب اور وزیر مملکت بلال اظہر کیانی شریک نہیں تھے، جس پر کئی اراکین نے ناراضگی کا اظہار کیا۔ اراکین کا کہنا تھا کہ اہم ٹیکس پالیسیوں پر بات چیت کے لیے متعلقہ حکام کا موجود ہونا ضروری ہے۔

نوید قمر نے کہا کہ چیئرمین ایف بی آر کے بغیر اس معاملے پر کوئی فیصلہ ممکن نہیں۔ انہوں نے بتایا کہ موبائل فون کے ٹیکس، درآمدی پالیسی اور دیگر تکنیکی امور ایف بی آر کے دائرہ کار میں آتے ہیں، اس لیے ان کی شرکت ضروری ہے۔

اجلاس کے دوران علی موسیٰ گیلانی نے مطالبہ کیا کہ سمندر پار پاکستانیوں کو کم از کم سال میں ایک موبائل اپنے خاندان کو بطور تحفہ بھیجنے کی اجازت ہونی چاہیے۔