اے آئی استعمال کرنے والے خبردار؛ پی ٹی اے سے بڑی خبر آگئی

پاکستان ٹیلی کمیونیکیشن اتھارٹی (پی ٹی اے) نے صارفین کے لیے مصنوعی ذہانت (AI) کے محفوظ اور ذمہ دارانہ استعمال کے حوالے سے خصوصی ہدایت نامہ جاری کیا ہے۔

اس ہدایت نامے میں صارفین کو اپنی ذاتی معلومات کے تحفظ پر خصوصی توجہ دینے کی تاکید کی گئی ہے۔ پی ٹی اے نے واضح کیا ہے کہ حساس دستاویزات یا ذاتی ڈیٹا کسی بھی AI پلیٹ فارم پر اپ لوڈ نہیں کرنا چاہیے۔

ہدایت نامے کے مطابق صارفین کو AI کے ذریعے حاصل شدہ جوابات کی تصدیق کرنا لازمی ہے تاکہ وہ جعلی یا گمراہ کن مواد سے متاثر نہ ہوں۔ پی ٹی اے نے عوام کو خبردار کیا ہے کہ مصنوعی ذہانت کے پلیٹ فارمز سے پیدا ہونے والے مواد پر بغیر تصدیق اعتماد نہ کیا جائے۔

پی ٹی اے کا کہنا ہے کہ اس اقدام کا مقصد ایک محفوظ اور مضبوط ڈیجیٹل ماحول قائم کرنا ہے۔ صارفین اپنی حفاظت خود کر سکتے ہیں اگر وہ محتاط رہیں اور AI کے استعمال میں ذمہ داری کا مظاہرہ کریں۔