2025 میں گوگل پر سب سے زیادہ کن شخصیات کو سرچ کیا گیا؟

2025 میں دنیا بھر میں گوگل سرچ کے رجحانات پر سیاست، ٹیکنالوجی اور تفریحی دنیا کی شخصیات کا واضح غلبہ رہا۔ مختلف ڈیجیٹل پلیٹ فارمز پر ہونے والے تجزیے کے مطابق چند معروف ناموں نے عالمی توجہ کا بڑا حصہ اپنی جانب مبذول کر لیا۔

Ahrefs کے سرچ ڈیٹا کی بنیاد پر PlayersTime کی رپورٹ میں بتایا گیا ہے کہ سابق امریکی صدر ڈونلڈ ٹرمپ 2025 میں دنیا کی سب سے زیادہ سرچ کی جانے والی شخصیت رہے۔ انہیں گزشتہ ایک سال کے دوران اوسطاً ماہانہ ایک کروڑ ساٹھ لاکھ سے زائد بار سرچ کیا گیا۔

دوسرے نمبر پر معروف ٹیکنالوجی ارب پتی ایلون مسک رہے، جن کی اوسط ماہانہ سرچز ایک کروڑ دس لاکھ کے قریب رہیں۔ ماہرین کے مطابق سیاست اور ٹیکنالوجی سے جڑے بیانات اور فیصلے ان کی مقبولیت کی بڑی وجہ بنے۔

عالمی ٹاپ 10 فہرست میں موسیقی کے شعبے کی نمایاں موجودگی بھی سامنے آئی۔ پاپ اسٹار ٹیلر سوئفٹ بدستور سب سے زیادہ سرچ کی جانے والی فنکاروں میں شامل رہیں۔ ان کے علاوہ سبریانا کارپنٹر، XXXTentacion اور رومیو سانتوس کو بھی ماہانہ 60 سے 80 لاکھ سرچز حاصل ہوئیں۔ اسٹریمنگ پلیٹ فارمز نے موسیقی سے وابستہ شخصیات کی عالمی رسائی میں اہم کردار ادا کیا۔

فلم اور ٹیلی ویژن سے وابستہ شخصیات کا بھی ٹاپ 100 سرچ فہرست میں سب سے بڑا حصہ رہا۔ رپورٹ کے مطابق اس شعبے کا مجموعی سرچ والیوم میں حصہ سب سے زیادہ رہا، جس کی بڑی وجہ آن لائن اسٹریمنگ سروسز اور عالمی ناظرین تک آسان رسائی ہے۔

کھیلوں کے شعبے میں اگرچہ مجموعی نمائندگی کم رہی، تاہم چند بڑے نام نمایاں رہے۔ پرتگالی فٹبال اسٹار کرسٹیانو رونالڈو بدستور سب سے زیادہ سرچ کیے جانے والے کھلاڑیوں میں شامل رہے۔ اسی طرح نوجوان ہسپانوی فٹبالر لامین یامال نے عالمی ٹاپ ٹین میں جگہ بنا کر ابھرتے ہوئے ٹیلنٹ کی مقبولیت کو ظاہر کیا۔

رپورٹ کے مطابق 2025 میں سرچ رجحانات صرف تفریح تک محدود نہیں رہے۔ عالمی سیاست، مذہبی قیادت اور ہائی پروفائل عدالتی مقدمات بھی عوامی دلچسپی کا مرکز بنے۔ مذہبی شعبے میں پوپ فرانسس سب سے زیادہ سرچ کی جانے والی شخصیت رہے۔

اعداد و شمار سے یہ بھی ظاہر ہوتا ہے کہ سرچ میں اضافہ اکثر فوری خبروں، وائرل واقعات اور میڈیا کوریج سے جڑا ہوتا ہے، نہ کہ صرف طویل المدتی شہرت سے۔

قومیت کے لحاظ سے تجزیہ بتاتا ہے کہ عالمی سرچ دلچسپی کا بڑا حصہ امریکی شخصیات کے گرد مرکوز رہا۔ ٹاپ 100 میں شامل امریکی شخصیات کو اوسطاً ماہانہ 23 کروڑ سے زائد سرچز ملیں، جو دیگر ممالک کے مقابلے میں کہیں زیادہ ہیں۔ عالمی ٹاپ ٹین میں شامل دس میں سے چھ شخصیات کا تعلق امریکا سے تھا۔

ماہرین کے مطابق 2025 میں عالمی توجہ کی نوعیت تیزی سے بدلتی رہی، جہاں سیاست، وائرل لمحات اور ڈیجیٹل میڈیا نے مقبولیت کے رجحانات کو براہِ راست متاثر کیا۔