موبائل فون صارفین کے لیے اہم خبر آگئی

نیشنل سائبر کرائم انویسٹی گیشن ایجنسی نے نئے سال کے موقع پر موبائل اور انٹرنیٹ صارفین کے لیے اہم ہدایات جاری کی ہیں۔

نیشنل سائبر کرائم انویسٹی گیشن ایجنسی کا کہنا ہے کہ سالِ نو کے موقع پر جعلی مبارکباد کے پیغامات اور مشکوک لنکس سوشل میڈیا اور میسجنگ ایپس پر گردش کر رہے ہیں۔

این سی سی آئی اے کے مطابق بعض عناصر صارفین کو جعلی تحائف یا انعامات کے پیغامات بھیج کر دھوکہ دینے کی کوشش کر رہے ہیں۔ صارفین کو ہدایت دی گئی ہے کہ کسی بھی نامعلوم لنک پر کلک نہ کریں اور اپنا واٹس ایپ یا کسی بھی ایپ کا تصدیقی کوڈ کسی کے ساتھ شیئر نہ کریں۔

اعلامیے میں واضح کیا گیا ہے کہ نامعلوم نمبروں سے آنے والے پیغامات اور لنکس موبائل ڈیٹا اور ذاتی معلومات کے لیے خطرناک ثابت ہو سکتے ہیں۔ ایک غلط کلک سے صارف کا ڈیٹا چوری ہو سکتا ہے یا موبائل ہیک ہو سکتا ہے۔

این سی سی آئی اے نے کہا ہے کہ یہ ہدایات حکومت کے شفافیت اور عوام کے تحفظ کے ایجنڈے کا حصہ ہیں۔ ادارہ سائبر کرائم کے خلاف اقدامات کر رہا ہے اور اصلاحات کے ذریعے احتساب اور شفاف نظام کو فروغ دیا جا رہا ہے۔