سوشل میڈیا صارفین خبردار!!! پی ٹی اے کا اہم اعلان

پاکستان ٹیلی کمیونی کیشن اتھارٹی نے سوشل میڈیا استعمال کرنے والوں کے لیے اہم ہدایات جاری کر دی ہیں۔

اتھارٹی نے عوام کو خبردار کیا ہے کہ آن لائن پلیٹ فارمز پر نفرت انگیز، ہتک آمیز اور گمراہ کن مواد پھیلانے سے باز رہا جائے۔ پی ٹی اے کا کہنا ہے کہ ایسے مواد سے معاشرتی انتشار پیدا ہوتا ہے اور قومی مفادات کو نقصان پہنچ سکتا ہے۔

پی ٹی اے کے مطابق سوشل میڈیا صارفین فوری طور پر غلط یا گمراہ کن پوسٹس کو ہٹا دیں۔ کسی بھی منفی مہم یا بے بنیاد بیانیے کا حصہ نہ بنیں۔ ادارے نے واضح کیا ہے کہ ریاستی اداروں، قومی سلامتی اور افراد کی عزت و وقار کے خلاف مواد قابل قبول نہیں ہے۔

اتھارٹی نے یاد دہانی کروائی ہے کہ پیکا ایکٹ کے تحت جان بوجھ کر جھوٹی معلومات پھیلانا، کسی کی ساکھ خراب کرنا یا نفرت انگیزی کرنا قابل سزا جرم ہے۔ پی ٹی اے کا کہنا ہے کہ ڈیجیٹل دنیا میں ذمہ دارانہ رویہ اختیار کرنا ہر شہری کی قومی ذمہ داری ہے۔

بیان میں مزید کہا گیا ہے کہ قوانین کی خلاف ورزی پر کسی قسم کی رعایت نہیں دی جائے گی۔ قانون کے مطابق بلا امتیاز کارروائی عمل میں لائی جائے گی۔ پی ٹی اے نے صارفین پر زور دیا ہے کہ وہ سوشل میڈیا کا استعمال مثبت، ذمہ دار اور قانونی حدود کے اندر رہتے ہوئے کریں۔