موبائل صارفین کیلئے بڑی خوشخبری؛ پی ٹی اے کا اہم اعلان

پاکستان ٹیلی کمیونیکیشن اتھارٹی نے موبائل صارفین کی جانب سے موصول ہونے والی شکایات پر اہم قدم اٹھایا ہے۔

 ادارے نے ویلیو ایڈڈ سروسز کی غیر قانونی اور غیر مجاز ایکٹیویشن کے معاملے پر باضابطہ ایڈوائزری جاری کر دی ہے۔ حالیہ دنوں میں کئی صارفین نے بتایا کہ ان کے موبائل نمبرز پر مختلف سروسز ان کی اجازت کے بغیر فعال کر دی گئیں۔ ان سروسز کے باعث ان کے بیلنس سے رقم بھی کٹتی رہی۔

ترجمان پی ٹی اے کے مطابق اتھارٹی نے اس معاملے کا سنجیدگی سے نوٹس لیا ہے۔ واضح کیا گیا ہے کہ کسی بھی صارف کی پیشگی رضامندی کے بغیر کوئی ویلیو ایڈڈ سروس ایکٹیویٹ نہیں کی جا سکتی۔ اگر کوئی کمپنی ایسا کرتی ہے تو یہ قواعد کی خلاف ورزی ہو گی۔ پی ٹی اے نے موبائل آپریٹرز کو ہدایت دی ہے کہ وہ صارفین کے حقوق کا مکمل تحفظ کریں۔

ایڈوائزری میں کہا گیا ہے کہ اب وی اے ایس ایکٹیویشن کے لیے ون ٹائم پاس ورڈ (او ٹی پی) کی تصدیق لازمی ہو گی۔ جب تک صارف خود او ٹی پی درج نہیں کرے گا، سروس فعال نہیں ہو سکے گی۔ اس اقدام کا مقصد فراڈ اور غیر مجاز چارجز کو روکنا ہے۔ اتھارٹی نے واضح کیا کہ او ٹی پی کسی کے ساتھ شیئر نہ کیا جائے۔

پی ٹی اے نے صارفین کو خبردار کیا ہے کہ وہ مشکوک لنکس پر کلک نہ کریں۔ غیر ضروری پیغامات اور کالز سے محتاط رہیں۔ اگر موبائل بیل پر غیر متعلقہ چارجز نظر آئیں تو فوراً اپنے متعلقہ موبائل آپریٹر سے رابطہ کریں۔ مسئلہ حل نہ ہونے کی صورت میں صارفین پی ٹی اے کے کمپلینٹ مینجمنٹ سسٹم میں شکایت درج کروا سکتے ہیں۔

ادارہ کا کہنا ہے کہ ٹیلی کام شعبے میں شفافیت لانا اس کی ترجیح ہے۔ صارفین کا اعتماد بحال رکھنا ضروری ہے۔ پی ٹی اے نے یقین دہانی کروائی ہے کہ خلاف ورزی کرنے والوں کے خلاف کارروائی کی جائے گی۔ اس اقدام سے امید ہے کہ غیر قانونی ویلیو ایڈڈ سروسز کی حوصلہ شکنی ہو گی اور صارفین کو غیر ضروری مالی نقصان سے بچایا جا سکے گا۔