اے آئی کی دنیا میں نیا انقلاب؛ چیٹ جی پی ٹی کے نئے ماڈل نے پچھلے تمام ریکارڈ توڑ دیے

اوپن اے آئی نے اپنے جدید ماڈل چیٹ جی پی ٹی 5.4 کو متعارف کروا کر مصنوعی ذہانت کے شعبے میں نیا انقلاب برپا کر دیا ہے۔ یہ ماڈل خاص طور پر پیشہ ورانہ اور پیچیدہ کاموں کے لیے تیار کیا گیا ہے۔

خبر رساں ادارے شنہوا کے مطابق جمعرات کو کمپنی نے اس نئے ماڈل کی باضابطہ رونمائی کی۔ اوپن اے آئی کے مطابق چیٹ جی پی ٹی 5.4 میں جدید منطق، کوڈنگ اور ورک فلو کی صلاحیتیں شامل ہیں۔ یہ ماڈل اپنے پچھلے ورژن جی پی ٹی 5.3 کوڈکس سے بھی زیادہ بہتر اور طاقتور ہے۔

کمپنی نے اس کے ساتھ چیٹ جی پی ٹی 5.4 پرو بھی متعارف کروایا ہے، جو زیادہ پیچیدہ اور پیشہ ورانہ کاموں کے لیے زیادہ مؤثر ورژن سمجھا جا رہا ہے۔ یہ ماڈل اسپریڈشیٹس، پریزنٹیشنز اور دستاویزات پر کام کرنے میں بہتر کارکردگی دکھاتا ہے اور صارفین کو پیشہ ورانہ کام جلد اور آسانی سے مکمل کرنے میں مدد دیتا ہے۔

نئے ماڈل کی ایک خاص بات یہ ہے کہ یہ بڑے سیاق و سباق کو بہتر طور پر سمجھتا ہے اور ویب سرچ کے ساتھ بھی مربوط ہے۔ اس میں تھنکنگ موڈ بھی شامل ہے، جو صارف کو جواب دینے سے پہلے منطق واضح کرنے کی سہولت دیتا ہے اور ہدایات میں تبدیلی کی اجازت دیتا ہے۔

مزید برآں، چیٹ جی پی ٹی 5.4 اسکرین شاٹس کے ذریعے مختلف انٹرفیس عناصر کو پہچان سکتا ہے اور بعض سافٹ ویئر میں ماؤس اور کی بورڈ کے استعمال سے بنیادی آپریشنز بھی انجام دے سکتا ہے۔

بنچ مارک ٹیسٹ کے مطابق یہ ماڈل پچھلے ورژنز سے زیادہ بہتر نتائج دیتا ہے۔ جی ڈی پی ویل موازنہ ٹیسٹ میں اس نے 83 فیصد کیسز میں صنعتی ماہرین کے برابر یا ان سے بہتر نتائج دیے۔ کوڈنگ ٹیسٹ میں بھی اس نے اپنے پچھلے ورژن سے زیادہ اسکور حاصل کیا۔

اوپن اے آئی کے مطابق یہ ماڈل معلومات کے اعتبار سے زیادہ درست ہے اور غلط معلومات پیدا ہونے کا امکان پہلے کے مقابلے میں کم ہے۔

یہ ماڈل اب پرو، ٹیم اور چیٹ جی پی ٹی پلس صارفین کے لیے دستیاب ہے۔ ڈویلپرز بھی اسے API کے ذریعے استعمال کر سکتے ہیں۔ کمپنی نے اعلان کیا ہے کہ آنے والے مہینوں میں تھنکنگ موڈ کو مرحلہ وار ختم کر دیا جائے گا۔