پیغامات پڑھنے کے بعد خودکار طور پر ڈیلیٹ؛ واٹس ایپ کا نیا فیچر

واٹس ایپ صارفین کے لیے نیا پرائیویسی فیچر متعارف کروانے جا رہا ہے، جس کے ذریعے حساس پیغامات پڑھنے کے بعد خود بخود حذف ہو جائیں گے۔ اس اقدام کا مقصد صارفین کی نجی گفتگو کو محفوظ بنانا اور اہم معلومات کے تحفظ کو بہتر بنانا ہے۔

یہ فیچر "After Reading” کے نام سے متعارف کروایا جا رہا ہے اور اس وقت تجرباتی مرحلے میں ہے۔ اس فیچر کے تحت جیسے ہی کوئی پیغام کھولا جائے گا، محدود وقت کے بعد وہ خود بخود چیٹ سے غائب ہو جائے گا۔ اگر پیغام کھولا نہ بھی جائے تو مقررہ مدت کے بعد یہ خودکار طور پر حذف ہو جائے گا، تاکہ غیر ضروری اور پڑھے نہ گئے پیغامات چیٹ میں جمع نہ ہوں۔

اہم بات یہ ہے کہ یہ فیچر ریڈ رسیٹس بند ہونے کی صورت میں بھی مؤثر طریقے سے کام کرے گا۔ ایپ خود بخود پیغام کے کھولنے کا اندازہ لگا کر اسے ڈیلیٹ کر دے گی۔ اس سے صارفین حساس معلومات جیسے ون ٹائم پاس ورڈ یا ذاتی ڈیٹا صرف محدود وقت کے لیے شیئر کر سکیں گے۔

اس اقدام سے واٹس ایپ صارفین کی پرائیویسی مضبوط ہوگی اور ڈیجیٹل کمیونیکیشن زیادہ محفوظ اور قابل اعتماد بنے گی۔ تاہم، اس فیچر کی مکمل دستیابی کے لیے ابھی مزید وقت درکار ہے اور اپڈیٹس کے ذریعے یہ صارفین کے لیے فعال کیا جائے گا۔