بھارت: یونیورسٹی کے قریب دیوار پر آزاد کشمیر اور آزاد فلسطین کے نعرے درج

بھارتی ریاست مغربی بنگال میں جادھو پور یونیورسٹی کے قریب ایک دیوار پر آزاد کشمیر اور آزاد فلسطین کے نعرے درج کئے گئے ہیں۔

کشمیر میڈیا سروس کے مطابق آزاد کشمیر اور آزاد فلسطین نعرے تحریر کیے جانے کے بعد یونیورسٹی میں ایک نیا تنازعہ کھڑا ہوگیا ہے۔

یہ واقعہ یکم مارچ کو ریاستی وزیر تعلیم برتیا باسو کے قافلے میں شامل کار کی ٹکر سے دو طلبا کے زخمی ہونے کے بعد جاری مظاہروں کے دوران پیش آیا۔

یونیورسٹی کے گیٹ نمبر تین کے قریب ایک دیوار پر کالے رنگ سے آزاد کشمیر اور آزاد فلسطین کے نعرے تحریر کیے گئے تاہم یہ معلوم نہیں ہو سکا کہ نعرے کس تنظیم نے درج کیے۔

وزیر تعلیم کے قافلے کی گاڑی کی ٹکر سے طلباء کے زخمی ہونے کے واقعے کے خلاف گزشتہ کئی دنوں سے یونیورسٹی میں احتجاجی مظاہرے جاری ہیں۔

دوسری جانب کولکتہ پولیس نے بائیں بازو کی طلبہ تنظیم پروگریسو ڈیموکریٹک اسٹوڈنٹس فیڈریشن کے حامیوں کے خلاف مقدمہ درج کرلیا۔

کیمپس سربراہ کیشالے رائے نے اس واقعے پر گہری تشویش کا اظہار کیا اور ساتھ ہی کیمپس میں ایسی سرگرمیوں کو روکنے کے لیے سخت اقدامات کا مطالبہ کیا ہے۔

ادھر پولیس اس معاملے کی تحقیقات کر رہی ہے اور سی سی ٹی وی فوٹیج سمیت دیگر شواہد کی جانچ کر رہی ہے تاکہ اس گرافیٹی کو پینٹ کرنے والوں کا پتہ چلایا جا سکے۔