اسرائیل کی غزہ پر پھر بمباری؛ ایک دن میں 330 شہادتیں! عرب ممالک خاموش

مسلمانوں کے مقدس ترین ماہ رمضان المبارک کے دوران اسرائیلی فورسز نے جنگ بندی ختم کرتے ہوئے نہتے فلسطینیوں پر بمباری کرکے 330 سے زائد فلسطینیوں کو شہید کردیا۔

میڈیا رپورٹس کے مطابق اسرائیلی طیاروں نے عین سحری کے وقت حملہ کیا، جب لوگ گھروں، اسکولوں اور پناہ گزین کیمپوں میں کھانے کی تیاری کررہے تھے۔

غزہ کے مختلف علاقوں جبالیہ، غزہ سٹی، نصیرات، دیر البلح اور خان یونس میں کئی عمارتیں ملبے کا ڈھیر بن گئیں جبکہ خواتین اور بچوں سمیت درجنوں افراد شہید ہوگئے۔

مزید پڑھیں: فلسطینیوں کی مستقل نقلِ مکانی؛ ٹرمپ بیان سے پیچھے ہٹ گئے

غزہ کی وزارت صحت کے مطابق، اسرائیل کی تازہ بمباری کے بعد غزہ میں شہادتوں کی مجموعی تعداد 48 ہزار 572 تک جا پہنچی جبکہ سرکاری میڈیا آفس کا کہنا ہے کہ یہ تعداد 61 ہزار 700 سے تجاوز کر چکی ہے۔

حماس نے اسرائیل کے اس حملے کو غدارانہ حملہ قرار دیتے ہوئے عرب و اسلامی ممالک سے مطالبہ کیا کہ وہ فلسطینی عوام کے حق میں آواز بلند کریں۔

مزید پڑھیں: یرغمالیوں کی رہائی؛ امریکا بھی حماس کے سامنے جھکنے پر مجبور

قابض اسرائیلی وزیراعظم نیتن یاہو نے اعلان کیا ہے کہ یہ جنگ بندی کا خاتمہ ہے اور حملے اس وقت تک جاری رہیں گے جب تک تمام یرغمالی آزاد نہیں ہوجاتے۔

مزید پڑھیں: فلسطینیوں کی غزہ سے بےدخلی؛ امریکا نے افریقی ممالک بات چیت تیز کردی

اسرائیلی وزیر دفاع نے بھی "غزہ پر جہنم کے دروازے کھولنے” کی دھمکی دی اور کہا کہ حماس پر پہلے سے کہیں زیادہ خوفناک حملے کیے جائیں گے۔

وائٹ ہاؤس کے مطابق، اس حملے سے قبل اسرائیل نے سابق امریکی صدر ڈونلڈ ٹرمپ سے مشاورت کی تھی جبکہ امریکی انتظامیہ کا کہنا ہے کہ اسرائیل کے خلاف مزاحمت کرنے والے سبھی گروہوں کو اس کی قیمت چکانی ہوگی۔