ٹرمپ کی صحت سے متعلق تشویشناک خبر آ گئی

امریکی صدر ڈونلڈ ٹرمپ کی صحت سے متعلق تشویشناک خبر آ گئی ہے۔

ترجمان وائٹ ہاؤس کیرولین لیوٹ نے اپنے جاری کردہ ایک بیان میں کہا کہ صدر ڈونلڈ ٹرمپ کی ٹانگوں کے نچلے حصوں میں سوجن اور ہاتھوں پر نیل کا معائنہ کیا گیا ہے۔

انہوں نے کہا کہ صدر ٹرمپ کے معالج کے مطابق صدر ٹرمپ نسوں میں کمزوری کی علامات کا شکار ہیں۔

ان کا کہنا تھا کہ ایسی علامات عموماً 70 سال سے زائد عمر کے افراد میں ظاہر ہوتی ہیں۔

کیرولین لیوٹ نے کہا کہ ٹرمپ کی حالیہ تصاویر میں ان کے ہاتھ کی پُشت پر معمولی نیل دیکھے گئے، ایسے نیل کے نشان بار بار ہاتھ ملانے اور اسپرین کے استعمال سے جلد کے ٹشوز میں جلن کی وجہ سے ہوتے ہیں۔

ترجمان وائٹ ہاؤس کا مزید کہنا تھا کہ دل کی بیماریوں سے بچاؤ کی دوا اسپرین صدر ٹرمپ کی معمول کی دواؤں میں شامل ہیں۔